Antas de Ulla organiza unha sesión para adestrar á veciñanza en trámites e xestións en liña

venres, 17 de xaneiro do 2025 S. P.

O Concello de Antas de Ulla organiza o próximo luns, 20 de xaneiro, unha sesión formativa e divulgativa encadrada no programa Administración. Preto de ti para asesorar dixitalmente aos veciños e veciñas e formalos nas principais xestións e operacións que se poden levar a cabo hoxe a través da Rede, tanto coas administracións como con outras entidades.
Coa colaboración da Delegación do Goberno en Galicia e da Subdelegación do Goberno en Lugo, a Casa da Cultura de Antas de Ulla será o escenario de sesión ás 10:30 horas.
“Temos que evitar a fenda dixital, sobre todo coas persoas maiores, e con esta sesión daremos asesoramento sobre os trámites e xestións máis habituais, resolvendo por exemplo as dúbidas dos veciños e veciñas para obter o certificado dixital e a Cl@ve permanente para relacionarse de xeito electrónico coas administracións públicas”, sostén a alcaldesa, Pilar García Porto
Acudirá tamén persoal do SEPE e da Seguridade Social para ofrecer información sobre os trámites realizados polos mesmos.