Caterpillar achega a Europa un smartphone reforzado

Os usuarios que precisen dun smartphone moi resistente sen prescindir das funcionalidades dos terminais modernos poden adquirir agora dende o Reino Unido un novo móbil que chega cunha marca reputada como Caterpillar, o que é toda unha garantía para o público industrial. O CAT B15 chega a un prezo de 299 libras esterlinas (uns 368 euros, con portes incluídos) ofrecendo un smartphone con Android 4.1 que funciona cun procesador MediaTek MT6577 de dobre núcleo a 1 GHz, 512 Mb de RAM, 4 Gb de almacenamento interno ampliable mediante tarxetas microSD de ata 32 Gb, pantalla de 4 polgadas cunha resolución de 800 x 480 píxeles con protección Gorilla Glass e capaz de funcionar con dedos húmidos e cámaras de 5 e 0,3 Mpíxeles, que presume de poder operar a temperaturas de entre 20 graos baixo cero e 55 graos centígrados, ser capaz de soportar unha caída sobre cemento a unha altura de 1,8 metros e ter resistencia IP67 (polo que podería somerxerse ata 30 minutos a 1 metro de profundidade, sendo tamén resistente ao po). As súas medidas son de 125 x 69,5 x 14,95 milímetros e pesa 170 gramos.