Voicemod comercializa un accesorio para modificar a nosa voz mentres xogamos coa consola

Dende hai bastante tempo Voicemod ofrece aos seus usuarios tecnoloxía de modulación de voz mediante IA para empregar mentres se xoga en liña, permitindo así a transformación da nosa voz (con máis de 150 voces distintas creadas pola compañía e milleiros máis creadas pola comunidade de usuarios) e o lanzamento de efectos e sons para animar a interacción cos amigos, para o que este servizo instalaba un micrófono virtual no noso equipo.
Dado que esta solución só estaba dispoñible para ordenadores persoais, decidiron abrirse ás consolas cunha solución de hardware: o accesorio coñecido como Voicemod Key. Falamos dun pequeno trebello que podemos conectar ao noso smartphone (onde temos que instalar a aplicación de Voicemod que se encarga de modificar a nosa voz e disparar os sons que queiramos) á vez que conta tamén con conectores físicos para auriculares con micrófono (os típicos que se empregan para conversar nos xogos en liña) á toma de auriculares da nosa consola (normalmente presente no mando de xogo).
O curioso deste accesorio é que non se comercializa para a súa venda, senón que se ofrece sen custo adicional cunha subscrición a Voicemod Pro, que en promoción custa 35,99 dólares/ano (en anos sucesivos custaría 59,99 dólares/ano).
Este dispositivo estaba inicialmente dispoñible nos EE.UU., pero Voicemod vén de ampliar internacionalmente o seu servizo de subscrición de xeito que o Voicemod Key inicia a súa dispoñibilidade en España (aínda que a compañía salienta que non se fai responsable do tempo de entrega do dispositivo, que pode ser bastante elevado).