Código Cero - Diario Tecnolóxico de Galicia

O venres estréase un documental do Real Madrid para Apple Vision Pro

Marcus Fernández — 2026-05-20T20:00:00Z

O pasado mes de novembro Eddy Cue visitou o estadio Santiago Bernabéu, onde tivo un encontro con Florentino Pérez no que aproveitaron para anunciar unha colaboración entre Apple e o Real Madrid para a produción dun documental inmersivo para Apple Vision Pro.
Esta peza audiovisual captado con máis de trinta cámaras Blackmagic URSA Cine Immersive permite achegar unha visión inédita tanto do terreo de xogo como do que acontece por detrás, grazas á sensación de inmersión que poden aportar os visores de realidade virtual, que para moitos sería o anticipo do concepto de Bernabéu Infinito que defende Florentino, e que se corresponde coa posibilidade de vivir a experiencia dun partido dende a casa como se estivese no estadio, pero sen limitacións de capacidade nin de distancia.
Tras varios meses de espera, anuncian hoxe que este venres estrearán o documental Real Madrid: The Weight of Greatness, que introducirá ao espectador dun xeito inmersivo nun día de partido da Champions. A peza audiovisual ten unha duración de pouco máis de 20 minutos e intercala imaxes de acción sobre o terreo de xogo con entrevistas centradas no club. Conta coa presenza de figuras como Kylian Mbappé, Vinícius Junior, Jude Bellingham e Thibaut Courtois, e pese a que estamos ante unha produción sobre un club español, non podemos ignorar o feito de que o dispositivo preciso para a súa reprodución (Apple Vision Pro) segue sen comercializarse en España, polo que a meirande parte do público potencial deste breve documental quedará sen a posibilidade de gozar de tal experiencia.

Tráiler do documental

A Xunta impulsa 32 cursos gratuítos en liña para mellorar competencias dixitais e profesionais

S. P. — 2026-05-20T19:07:45Z

A Xunta de Galicia mantén aberta unha nova convocatoria de formación gratuíta dirixida a traballadores por conta allea e autónomos da comunidade, cun total de 32 cursos en diferentes áreas profesionais orientadas á mellora da empregabilidade e á actualización de competencias.
As accións formativas desenvólvense en modalidade en liña e sen horarios fixos, permitindo compatibilizar a aprendizaxe coa actividade laboral e persoal. Ademais, algunhas formacións dispoñen tamén de prazas limitadas para persoas desempregadas de Galicia.
A oferta está 100 % subvencionada pola Xunta de Galicia, o Ministerio de Educación, Formación Profesional e Deportes e o Ministerio de Traballo e Economía Social. Trátase de formación non bonificada, polo que non consume créditos de formación nin require xestións por parte das empresas.
Entre as áreas con maior demanda destacan a intelixencia artificial, as competencias dixitais avanzadas, o comercio electrónico e a xestión de proxectos. Entre os cursos máis destacados figuran accións formativas de ChatGPT e intelixencia artificial, de competencias dixitais avanzadas, de negocios en liña e comercio electrónico e de xestión integrada de proxectos.
A programación complétase con formación relacionada cos ámbitos administrativo, sanitario, educativo, loxístico, fiscal, enerxético e creativo, así como con títulos oficiais vinculados á formación profesional para o emprego e ao ámbito administrativo.
Segundo datos da Rede CeMIT, máis de 119.000 persoas participaron xa en accións gratuítas de capacitación dixital en Galicia, reflexo do crecente interese pola actualización profesional nun contexto marcado pola transformación tecnolóxica.
O prazo de inscrición permanece aberto ata completar prazas.
As persoas interesadas poden consultar toda a oferta formativa e solicitar praza a través da web de Femxa Galicia.

O novo Plan da Lingua Galega seguirá poñendo o foco nas posibilidades do dixital

S. P. — 2026-05-20T16:30:00Z

O conselleiro de Cultura, Lingua e Xuventude, José López Campos, compareceu no Parlamento galego avanzando detalles da actualización do Plan Xeral de Normalización da Lingua Galega, un dos piares do Pacto pola Lingua impulsado pola Administración autonómica. Segundo dixo, o documento da revisión do plan presentarase o vindeiro mes de xuño e con el “ábrese un novo escenario para acadar medidas fundamentais para a nosa lingua”.
O conselleiro sinalou que “desde o principio tivemos a man tendida á participación neste proceso polo ben do galego, no que involucramos sempre aos grupos parlamentarios que así o quixeron”. Neste senso, destacou que a renovación do plan é resultado do traballo de 11 comisións de expertos en diversas materias que durante os pasados meses realizaron máis 400 contactos e recolleron 1.400 propostas, incluídas as achegas da sociedade a través dunha caixa virtual.
López Campos fixo fincapé noutras medidas desenvolvidas a prol da lingua mentres se estivo traballando paralelamente na actualización do Plan Xeral de Normalización da Lingua Galega “para fomentar e prestixiar o idioma en moi diversos eidos e sectores profesionais”. Fixo referencia así aos 100 cursos de cultura e lingua galegas que se puxeron en marcha para persoas provenientes de fóra de Galicia, nos que participaron máis de 1.500 persoas, e aos que se suman outras propostas formativas en ámbitos moi específicos como o da sanidade, a administración ou a xustiza.
Así mesmo, entre outras accións, López Campos tamén destacou que no 2025 desenvolvéronse, por primeira vez, as probas CELGA en liña, para as que se recibiron máis de 600 solicitudes, avanzando deste xeito no obxectivo de chegar a máis persoas para validar e acreditar o dominio da lingua galega.
Tamén resaltou “a colaboración da Xunta nas actividades de dinamización da lingua que se desenvolven en ámbitos escolares como son Falamos +, Fala que Fala ou 21 Días co Galego”. Todas elas, tal e como apuntou, “son propostas encamiñadas a achegar o idioma á xente moza, para a que tamén se preparan contidos no eido dixital, como é o caso do portal Xabarín.gal”.

Allariz acolle este venres unha xornada crítica co uso precoz e desregulado dos móbiles na adolescencia

S. P. — 2026-05-20T16:00:00Z

A campaña Escola Saudable de Ecoloxistas en Acción vai celebrar unha xornada de traballo e diálogo este venres 22 de maio en Allariz, nun acto organizado polas ANPAS Airiña e Vilanova de Allariz coa colaboración do Concello de Allariz e Adolescencia Libre de Móbiles.
A xornada, á que está convidada a participar a comunidade educativa, dará comezo ás 19.00 horas e clausurarase coa exposición do ilustrador galego Kiko Da Silva titulada Medrar con pantallas non é igual a progreso.
Ambas actividades invitan a reflexionar e sensibilizar sobre o uso dos medios dixitais nos eidos familiar, do ensino e social, así como das consecuencias do seu inicio precoz e desregulado e da necesidade de potenciar pactos de familia para atrasar a introdución dun primeiro smartphone.
O faladoiro contará como relator a un coordinador da campaña Escola Saudable, que participa na plataforma Adolescencia Libre de Móbiles e colabora co Movemento OFF: Xulio Carmona, enfermeiro de saúde mental e experto en adiccións tecnolóxicas.
Informarase dos consensos e alertas científicas sobre a disrupción do uso precoz das pantallas na saúde física e mental, o neurodesenvolvemento e a aprendizaxe, ademais da súa pegada ambiental e as estratexias algorítmicas de enxeñería social.
Informarase de pautas concretas, encamiñadas a postergar/negociar o uso de pantallas en menores, e dos pactos de familia de Adolescencia Libre de Móbiles nesa liña.
No faladoiro exporanse os 4 vídeos da campaña Escola Saudable e distribuiranse as súas guías e folletos: como a guía ilustrada de Kiko da Silva (Medrar con pantallas non é progreso), os folletos de orientacións prácticas para as familias sobre dispositivos móbiles intelixentes e unha guía de apoio á exposición.

Comeza a conta atrás para o Foro Empresa e IA de Vigo

S. P. — 2026-05-20T15:26:39Z

O vindeiro mércores 10 de xuño Quincemil e NTT DATA organizan o Foro Empresa e Intelixencia Artificial de Vigo, co lema Unha transformación intelixente e sostible. Desenvolverase a partir das 18.00 horas na Sede da Zona Franca de Vigo (no 46 da rúa do Areal) contará coa colaboración do centro tecnolóxico Gradiant, referente en desenvolvemento de novos proxectos tecnolóxicos avanzados e en transferencia cara as empresas.
O programa completo será desvelado a longo dos vindeiros días.
Participarán na benvida institucional Pablo Grandío, director de Treintayseis, e David Regades, delegado da Zona Franca de Vigo. Na axenda provisional inclúese unha charla a cinco voces con empresas punteiras galegas baixo o epígrafe O impacto da IA nas empresas de Vigo. A cita rematará ás 20.30 horas cun cóctel e cunha xeira de networking.
Será un foro (un espazo de diálogo do tecido empresarial do sur de Galicia) para coñecer as últimas tendencias de intelixencia artificial aplicada á empresa na área metropolitana de Vigo.

Sony celebra os 10 anos dos seus auriculares 1000X cunha edición premium

Redacción — 2026-05-20T14:00:00Z

Sony anunciou os novos auriculares 1000X The Collexion, unha edición premium da súa coñecida familia 1000X coa que busca combinar o rendemento acústico característico da marca cun enfoque máis refinado no deseño, os materiais e a comodidade de uso. O lanzamento coincide co décimo aniversario da serie, iniciada en 2016 cos MDR-1000X.
Os novos auriculares apostan por unha construción baseada en materiais de alta gama, cunha diadema metálica de acabado mate e detalles pulidos manualmente. A cobertura exterior emprega unha pel sintética desenvolvida durante dous anos e intégranse botóns metálicos e aberturas para os micrófonos nun corpo sen interrupcións visuais. Comercialízanse en cor negra e platino.
Sony quixo asociar o lanzamento a unha figura musical recoñecible, escollendo ao violinista Ara Malikian como embaixador do produto. A marca destaca a súa capacidade para transmitir emoción e matices sonoros como exemplo da filosofía detrás destes auriculares.
Os 1000X The Collexion incorporan unha nova unidade de diafragma cunha cúpula de alta rixidez fabricada en material composto de carbono unidireccional. Segundo Sony, esta configuración mellora a separación entre voces e instrumentos e amplía a riqueza do espazo sonoro.
Os auriculares convértense ademais nos primeiros da marca en integrar DSEE Ultimate, unha tecnoloxía baseada en Edge-AI que reconstrúe en tempo real detalles perdidos nos ficheiros de audio comprimidos.
A experiencia espacial tamén gaña protagonismo coa expansión da función 360 Reality Audio Upmix a tres modos diferenciados para música, cinema e videoxogos, accesibles mediante un botón específico de Listening Mode.
En cancelación activa de ruído, os 1000X The Collexion empregan a mesma plataforma técnica dos WH-1000XM6, incluíndo 12 micrófonos e o sistema Adaptive NC Optimizer, aínda que as primeiras críticas aseguran que o modelo XM6 ten mellor cancelación de ruído activa. A autonomía anunciada chega ata as 24 horas con Bluetooth e cancelación de ruído activados.
Xunto ao novo modelo, Sony ampliou a gama WH-1000XM6 cunha nova cor area, un acabado cálido que se suma ás opcións xa existentes mantendo as mesmas prestacións técnicas.
Os auriculares 1000X The Collexion chegan ao mercado a un prezo recomendado de 629 euros, mentres que os WH-1000XM6 en cor area custan 399 euros actualmente (aínda que o seu prezo oficial sexa de 469 euros).

Vídeo de presentación dos auriculares 1000X The Collexion

Samsung presenta o primeiro monitor gaming 6K da industria

Redacción — 2026-05-20T12:00:00Z

Samsung presentou a súa nova xeración de monitores gaming Odyssey G8, unha gama que aposta por elevar o rendemento gráfico e a resolución máis aló do habitual no sector. A familia inclúe tres modelos diferentes e incorpora como principal novidade o que se presenta como o primeiro monitor gaming 6K da industria.
O novo Odyssey G8 de 32 polgadas (G80HS) introduce unha resolución 6K acompañada dunha frecuencia de actualización de ata 165 Hz, o que busca ofrecer unha maior definición visual e unha superficie de traballo máis ampla tanto para videoxogos como para multitarefa. O equipo tamén integra o sistema Dual Mode, que permite cambiar a unha resolución 3K para alcanzar os 330 Hz, orientándose así a xogadores que prioricen a velocidade de resposta en títulos competitivos.
A serie complétase cun Odyssey G8 de 27 polgadas (G80HF), capaz de funcionar en resolución 5K a 180 Hz ou chegar aos 360 Hz en QHD mediante Dual Mode. Esta configuración pretende combinar experiencias inmersivas con escenarios de xogo competitivo de alta frecuencia.
Samsung tamén renovou a súa liña OLED co Odyssey OLED G8 (G80SH), dispoñible en formatos de 27 e 32 polgadas. Este modelo emprega un panel QD-OLED con resolución 4K e taxa de refresco de 240 Hz. Entre as súas características destaca a tecnoloxía Glare Free, destinada a reducir os reflexos sen afectar á calidade da imaxe, así como a integración de USB-C con carga de ata 98 watts.
A variante OLED incorpora ademais a tecnoloxía QD-OLED Penta Tandem, coa que se promete mellorar a eficiencia, a durabilidade e o brillo do panel. O modelo de 32 polgadas conta tamén coa certificación VESA DisplayHDR True Black 500, centrada en ofrecer negros máis profundos e un maior contraste.
Toda a gama Odyssey G8 integra DisplayPort 2.1, pensado para facilitar o uso de gráficos de nova xeración cun maior ancho de banda. A compatibilidade con AMD FreeSync Premium e NVIDIA G-Sync Compatible pretende evitar cortes e problemas de sincronización durante as partidas, mentres que HDR10+ Gaming adapta en tempo real o brillo e o contraste segundo o contido mostrado.
A renovación da familia Odyssey chega nun momento no que Samsung asegura manter a súa posición destacada no mercado dos monitores gaming. Segundo datos de IDC incluídos pola compañía, concentra o 18,9 % da facturación mundial do sector e ocupa tamén o primeiro posto en monitores gaming OLED por terceiro ano consecutivo, cunha cota do 26 %.

Fortnite volve á App Store

Marcus Fernández — 2026-05-20T11:36:26Z

A loita xudicial entre Epic Games e Apple rematou hai meses, pero a normalidade tardou en restaurarse, e tras o regreso de Fortnite a Google Play en marzo, agora confirman o regreso en case todo o mundo de Fortnite á App Store. Deste xeito non será preciso instalar a tenda de aplicacións alternativa de Epic para instalar Fortnite nun iPhone ou iPad, e poderá realizarse a instalación como con calquera outro videoxogo.
Esta solución resulta moito máis cómoda para os usuarios, xa que a instalación de tendas de aplicacións alternativas para usuarios dentro da Unión Europea resultou ser un proceso demasiado complexo e escuro, facendo que se convertese nunha práctica residual e deixando as intencións da Comisión Europea para incrementar a competencia en iOS nunha proposta tan fútil como frustrante.
Dende Epic Games seguen a esixir que os lexisladores fagan cumprir as súas leis de verdade, con medidas que impidan os abusos de Apple e Google á hora de establecer comisións e condicións que para os desenvolvedores de aplicacións resultan inxustas e claramente desproporcionadas.

: Fortnite está a celebrar estes días un crossover con Overwatch

Starlink volve subir as súas tarifas en España

Redacción — 2026-05-20T11:15:00Z

O servizo de acceso á Internet a través de satélites de baixa altura de SpaceX, Starlink, non conforme con modificar as súas tarifas no mes de marzo, comunica aos seus usuarios que, a partir do 20 de xuño muda os prezos dos seus plans residenciais xustificando a suba na «forte demanda de Starlink», «as melloras continuas» e o incrementos dos custos operativos globais. A nova estrutura de tarifas xa se aplica a novos clientes.
O plan residencial cunha velocidade de 100 Mbps mantén o seu prezo en 29 euros/mes, pero o plan con 200 Mbps queda en 45 euros/mes (o seu prezo actual era de 39 euros/mes, e a primeiros de ano custaba 29 euros/mes) e o plan Max (con velocidades de ata máis de 400 Mbps) pasa a custar 65 euros/mes (actualmente custaba 59 euros/mes e en marzo tiña un prezo de 39 euros/mes).
Temos así unha importante escalada de prezos para os usuarios que queren manter un servizo de calidade (o plan Max era o ordinario no pasado), e no caso de querer manter cotas reducidas hai que padecer conexións máis lentas. Lamentablemente os usuarios non poden facer moito máis que someterse á arbitrariedade das tarifas de Starlink, servizo que, no caso de zonas afastadas, carece dunha competencia real, xa que o resto de servizos por satélite teñen unha latencias demasiado elevadas que imposibilitan moitos dos usos habituais da Rede.

O GaiásTech acollerá unha xornada sobre ecosistemas de datos para destinos intelixentes

S. P. — 2026-05-20T10:56:37Z

O vindeiro 10 de xuño de 2026, o Centro GaiásTech da Cidade da Cultura acollerá a xornada Ecosistemas de datos para destinos intelixentes, un evento organizado pola Axencia para Modernización Tecnolóxica de Galicia (AMTEGA) pensado para profesionais do turismo, administracións e axentes dixitais que queiran explorar como o uso de datos pode transformar a xestión turística en Galicia.
Durante a xornada, os asistentes coñecerán ferramentas e proxectos que permiten centralizar, analizar e explotar información clave sobre visitantes, tendencias e recursos turísticos, co obxectivo de mellorar a competitividade, eficiencia e sostibilidade dos destinos galegos.
O obxectivo é “situar a tecnoloxía e análise de datos como un eixo de innovación para a creación de valor no ámbito turístico”, sinalou AMTEGA.
O programa contará con relatorios e mesas de debate sobre plataformas intelixentes, e interoperabilidade de datos, así como sesións sobre tendencias tecnolóxicas aplicadas ao turismo. Entre os temas destacan exemplos de como os datos poden axudar a anticipar a demanda, optimizar a experiencia do visitante e crear novos servizos turísticos en Galicia. A xornada tamén inclúe espazos de networking para favorecer o intercambio de experiencias e boas prácticas.
Esta actividade enmárcase dentro das accións de GaiásTech, que buscan situar Galicia á vangarda da dixitalización turística e fomentar un modelo de destinos intelixentes baseados en información real e sostíbel.
As inscricións están dispoñíbles a través da páxina web do GaiásTech.

Un encontro analizará o impacto dos cambios tecnolóxicos nos medios públicos

Redacción — 2026-05-20T09:56:32Z

A Universidade de Santiago de Compostela, a Corporación de Servizos Audiovisuais de Galicia (CSAG) e a Federación de Organismos de Radio e Televisión Autonómicos (FORTA) organizan o vindeiro 11 de xuño a xornada O profesional sénior nos medios públicos en 2035, un encontro centrado na transformación do oficio xornalístico ante os cambios tecnolóxicos e industriais que xa están a redefinir o sector audiovisual.
A Facultade de Ciencias da Comunicación de Santiago acollerá esta cita, á que xa é posible inscribirse de balde, e na que participarán responsables de innovación e transformación das doce canles integradas en FORTA, docentes universitarios, especialistas do ámbito da comunicación e profesionais júnior, incluídos estudantes en prácticas que representan a xeración chamada a ocupar os perfís sénior na próxima década.
O encontro busca analizar como evolucionará o papel dos profesionais con maior experiencia nos medios públicos nun escenario marcado pola automatización, a intelixencia artificial e a competencia crecente das plataformas globais. A organización destaca que estes factores están a obrigar os medios de proximidade a reinventaren os seus modelos sen renunciar á súa función de servizo público.
A xornada estruturarase arredor de catro paneis de debate que abordarán distintas dimensións desta transformación. O primeiro centrarase na definición do perfil do comunicador sénior en 2035, incluíndo cuestións como a formación necesaria ou a progresiva hibridación entre competencias técnicas e xornalísticas. O segundo analizará que habilidades se reforzan coa automatización e cales poden quedar erosionadas, así como os retos para transmitir o oficio nun sector que evoluciona máis rápido ca os propios plans de estudo.
A terceira mesa abrirá o debate arredor dos límites da intelixencia artificial nos procesos editoriais e do espazo que continuará reservado ao criterio humano e á experiencia profesional. Finalmente, o cuarto bloque tratará a capacidade dos medios públicos para atraer e reter talento cualificado nun mercado cada vez máis competitivo.
A convocatoria coincide coa celebración en Santiago da reunión da Comisión de Transformación e Innovación de FORTA, coordinada durante o primeiro semestre de 2026 pola CSAG. A colaboración entre as tres institucións pretende consolidar unha liña de investigación permanente sobre o futuro do xornalismo público e dará lugar á elaboración dun estudo avalado pola USC e FORTA arredor do perfil profesional sénior nos medios públicos en 2035.

Abanca únese ao proxecto Qivalis para crear unha stablecoin europea

S. P. — 2026-05-20T09:43:07Z

Abanca anunciaba hoxe que se vén de unir ao proxecto de Qivalis para lanzar unha stablecoin europea, ou sexa unha criptomoeda estábel ou activo dixital deseñado para manter un valor constante.
Deste xeito o banco incorpórase ao consorcio creado recentemente e formado xa por 37 entidades financeiras procedentes de 15 países da Unión Europea. Coa súa entrada, Abanca busca contribuír á creación dunha ferramenta financeira independente e confiábel, aberta á cidadanía e ás empresas, desenvolvida en clave europea e co apoio dalgúns dos axentes máis importantes do sistema bancario da zona euro.
Coa definición desta futura stablecoin europea búscase dar unha resposta aos consumidores que demandan unha moeda estábel ao abeiro do euro, xa que a inmensa maioría do mercado toma como base o dólar estadounidense. Este recurso dixital operará baixo tecnoloxía blockchain e está a ser deseñado conforme ao Regulamento de Mercados de Criptoactivos (MiCA) da Unión Europea. Unha vez obtida a aprobación regulatoria e completados os desenvolvementos técnicos, a estimación é emitir a nova moeda estábel na segunda metade do ano.
Con esta acción, Abanca permite ao banco formar parte da definición dun proxecto que defende a soberanía financeira europea, que contribúe a reforzar a moeda única na contorna dixital e que está apoiado pola credibilidade de decenas de entidades líderes nos seus países e baixo unha estrita supervisión regulatoria.
En resumo, Abanca reafirma a súa aposta pola innovación financeira e a construción dun futuro dixital apoiado pola credibilidade colectiva dos principais bancos europeos e preservando a autonomía monetaria do euro.

R mostrará nunha xornada como aplicar a IA de forma práctica na nosa empresa

S. P. — 2026-05-20T08:00:00Z

O Club Empresarial Nordés vai acoller este mes de xuño a xornada Como aplicar a IA de forma práctica na túa empresa. Será o venres 12 de xuño, ao mediodía, en horario de 12.30 a 13.30 horas, e está organizada pola operadora galega R, que contextualiza a sesión na necesidade das empresas de clarificar conceptos en materia de IA: “A intelixencia artificial está na fala da xente, pero moitas empresas comparten a mesma dúbida: por onde empezar e que ten realmente sentido aplicar hoxe”, explican dende R.
No encontro de Nordés Club Empresarial, daranse resposta a este tipo de preguntas, aclararanse dúbidas e explicarase de xeito práctico como aplicar a IA na empresa de forma útil e realista. Amais, analizarase como a IA xa pode incorporarse á operativa diaria das empresas para mellorar a produtividade, automatizar procesos e apoiar a toma de decisións: IA para produtividade interna (exemplos sinxelos de como apoiar o traballo dos equipos, aforrar tempo e gañar eficiencia), automatización de procesos (que tarefas poden automatizarse hoxe con sentido práctico e sen grandes proxectos) e implantación sinxela de axentes de IA (sen necesidade de programar, nin coñecementos tecnolóxicos previos, como utilizar axentes de IA que están previamente configurados para calquera tipo de tarefa na empresa).
Programa de actividades
12:30 h: Benvida.
Alfredo Ramos, director R e director territorial en MasOrange.
12:35 h: Como aplicar a IA de forma práctica na túa empresa.
Alberto Díaz, responsábel de produto IA & Data R e Orange Empresas.
13:25 h: Peche.
13:30 h: Viño networking.

Google avanzou detalles das súas futuras lentes con IA

Redacción — 2026-05-19T20:30:00Z

Google aproveitou a conferencia Google I/O 2026 para avanzar novos detalles sobre a súa aposta polas lentes baseadas en Android XR, a plataforma desenvolvida xunto con Samsung e Qualcomm arredor das capacidades de Gemini. O primeiro modelo comercial chegará este mesmo outono en formato de lentes con audio integrado, mentres que máis adiante tamén haberá versións con pantalla incorporada.
As novas lentes están concibidas para ofrecer asistencia contextual sen obrigar ao usuario a consultar continuamente o smartphone. O acceso a Gemini poderá facerse mediante o comando Hey Google ou cun toque lateral na montura, permitindo realizar consultas, recibir indicacións ou executar tarefas sen empregar as mans.
Google explicou que as lentes estarán dispoñibles en diferentes deseños creados en colaboración con Samsung e coas marcas de óptica Gentle Monster e Warby Parker. A intención é que teñan unha aparencia convencional e cómoda para poder empregalas durante toda a xornada.
Entre as funcións anunciadas figura a posibilidade de consultar información sobre o que o usuario está vendo en tempo real. Gemini poderá identificar establecementos, interpretar sinais ou responder preguntas sobre elementos do contorno aproveitando a cámara integrada e os sensores de orientación.
O sistema tamén poderá ofrecer navegación paso a paso sabendo a posición exacta do usuario e a dirección cara á que está mirando. As indicacións combinaranse con recomendacións contextuais, como localizar restaurantes próximos acordes ás preferencias persoais ou engadir paradas durante unha ruta.
As capacidades de comunicación tamén ocupan un lugar destacado. As gafas permitirán realizar chamadas, responder mensaxes ou resumir correos electrónicos sen sacar o teléfono do peto. O audio reproducirase mediante altofalantes integrados deseñados para manter certa privacidade e evitar que outras persoas escoiten o contido con claridade.
Google tamén confirmou funcións fotográficas e de edición apoiadas na IA. As lentes poderán capturar fotografías e vídeos, mentres que ferramentas como Nano Banana permitirán modificar as imaxes mediante ordes de voz, eliminando elementos do fondo ou engadindo efectos humorísticos.
Outro dos usos destacados será a tradución en tempo real. As gafas serán capaces de traducir conversacións mantendo o ton e timbre da voz orixinal, ademais de interpretar textos presentes en menús, carteis ou sinais para reproducir a tradución mediante audio.
Gemini Intelligence encargarase ademais de automatizar tarefas multipaso en segundo plano. Google puxo como exemplo a realización de pedidos en servizos como DoorDash, nos que o usuario só tería que confirmar a operación final.
As gafas poderán interactuar con aplicacións instaladas no smartphone, incluíndo servizos de transporte como Uber ou ferramentas educativas como Mondly. A compatibilidade abranguerá tanto teléfonos Android como dispositivos iPhone.

O Google I/O 2026 amosa un futuro protagonizado por axentes de IA

Redacción — 2026-05-19T19:00:00Z

Google aproveitou a conferencia para desenvolvedores Google I/O 2026 para presentar unha profunda evolución da súa estratexia arredor da intelixencia artificial, situando Gemini no centro dunha nova xeración de produtos e servizos axénticos, capaces de actuar de maneira autónoma, persistente e contextualizada. O director executivo de Google, Sundar Pichai, destacou que a compañía de Mountain View entra nunha nova fase na que a IA deixa de limitarse á xeración de texto para converterse nun sistema capaz de executar tarefas complexas, comprender o mundo e interactuar de maneira continua cos usuarios.
A escala do crecemento da infraestrutura e dos servizos de IA converteuse nun dos grandes argumentos do evento. Google asegura procesar actualmente máis de 3.200 billóns de tokens ao mes, sete veces máis ca hai un ano. Tamén salientou a adopción das súas plataformas entre empresas e desenvolvedores: máis de 8,5 millóns de programadores utilizan mensualmente os modelos Gemini, mentres centos de clientes de Google Cloud xa procesan máis dun billón de tokens cada un.
A Busca continúa a ser o principal escaparate tecnolóxico da compañía. O chamado Modo IA supera xa os mil millóns de usuarios activos mensuais, mentres as Vistas Creadas con IA alcanzan os 2.500 millóns. Google considera que o buscador está a transformarse nun sistema conversacional permanente, no que as respostas deixan de ser simples listaxes de ligazóns para ofrecer experiencias dinámicas e personalizadas.
A aplicación Gemini tamén experimentou un forte crecemento, pasando de 400 a máis de 900 millóns de usuarios activos mensuais nun ano. Entre as novidades máis destacadas figura Gemini Spark, un novo axente persoal persistente capaz de actuar en segundo plano sobre tarefas prolongadas. Este sistema poderá integrarse con ferramentas propias de Google e tamén con servizos de terceiros mediante MCP. Spark funcionará tanto na aplicación Gemini como posteriormente en Chrome, onde actuará como un navegador axéntico capaz de executar accións directamente na web.
Google tamén presentou unha nova xeración de experiencias conversacionais integradas nos seus produtos. Pregunta a YouTube permitirá formular consultas complexas en linguaxe natural e acceder directamente aos fragmentos relevantes dos vídeos. Pola súa banda, Documentos Live transformará a creación de documentos mediante control por voz, permitindo ditar, editar e estruturar contidos oralmente sen empregar o teclado.
Google anunciou tamén a oitava xeración das súas TPU, dividida en dous chips especializados: TPU 8t para adestramento de modelos e TPU 8i para inferencia. A compañía asegura que o novo sistema permite distribuír o adestramento entre máis dun millón de TPU repartidas globalmente, reducindo drasticamente os tempos necesarios para desenvolver modelos de gran tamaño. Google prevé investir arredor de 190.000 millóns de dólares en infraestrutura este ano, fronte aos 31.000 millóns de 2022.
Outro dos anuncios centrais foi Gemini Omni, un modelo multimodal capaz de xerar vídeo, e posteriormente tamén imaxes e texto, a partir de calquera tipo de entrada. A primeira versión comercial será Gemini Omni Flash, xa dispoñible na aplicación Gemini, Google Flow e YouTube Shorts. Este sistema combina as capacidades lingüísticas de Gemini cos modelos multimedia desenvolvidos por Google.
A transparencia do contido xerado por IA tamén tivo protagonismo no evento. Google ampliará o uso de SynthID, o seu sistema de marca de auga invisible, que xa se utilizou para etiquetar máis de 100.000 millóns de imaxes e vídeos. Ademais, OpenAI, Kakao e Eleven Labs incorporaranse como socios da tecnoloxía. Google tamén integrará as Credenciais de Contido en Busca e Chrome para facilitar a identificación de materiais creados ou modificados mediante IA.
No ámbito dos modelos de IA, Gemini 3.5 Flash converteuse nun dos principais protagonistas. Google presume de que supera en numerosos indicadores ao anterior Gemini 3.1 Pro, cun rendemento especialmente destacado en programación e tarefas axénticas. Afirman que o novo modelo ofrece velocidades de xeración moi superiores ás doutros modelos avanzados do mercado, mantendo custos significativamente máis baixos.
A plataforma Antigravity evoluciona paralelamente cara a un sistema de coordinación de axentes autónomos. A nova versión Antigravity 2.0 incorpora unha aplicación independente para escritorio desde a que organizar e supervisar múltiples axentes de IA. Google asegura que determinadas versións optimizadas poden ser ata doce veces máis rápidas ca outros modelos de referencia.
A integración da IA esténdese tamén ao ecosistema Android. O novo espazo Android Halo permitirá supervisar en tempo real o estado das tarefas executadas polos axentes de Gemini.
Google Flow recibiu novas capacidades centradas na creación multimedia mediante axentes especializados, mentres Google Pics se presenta como unha ferramenta avanzada de edición de imaxes baseada no modelo Nano Banana, capaz de tratar os distintos elementos dunha escena como obxectos independentes editables.
A investigación científica tamén entra na folla de ruta da IA axéntica con Gemini for Science, unha plataforma que combina ferramentas de razoamento profundo, acceso a bases de datos científicas e integración con Antigravity para acelerar tarefas de investigación en ciencias biolóxicas.
O discurso de Google en I/O 2026 deixa clara unha orientación estratéxica: a compañía pretende que Gemini deixe de ser un simple asistente conversacional para converterse nunha infraestrutura transversal capaz de actuar de maneira autónoma sobre produtos, servizos e fluxos de traballo completos.

Vídeo da presentación inaugural de Google I/O 2026

Insta360 integra unha pantalla de tinta electrónica nos seus micrófonos sen fíos

Redacción — 2026-05-19T19:00:00Z

Insta360 anunciou o lanzamento do Insta360 Mic Pro, un novo sistema de micrófonos sen fíos orientado a creadores de contido, cineastas, podcasteiros e producións profesionais, apostando por funcións pouco habituais neste segmento como unha pantalla de tinta electrónica personalizable e un sistema de captación baseado en tres micrófonos integrados.
A súa característica máis rechamante é a incorporación dunha pantalla de tinta electrónica en cada transmisor, algo que se presenta como unha novidade dentro desta categoría de produto (mentres a competencia suxería a colocación de adhesivos para a personalización dos micrófonos). A través da aplicación de Insta360 poden cargarse logotipos, nomes ou gráficos personalizados que permanecen visibles mesmo co dispositivo apagado. Esta tecnoloxía tamén contribúe á autonomía, xa que a tinta electrónica só consome enerxía ao actualizar a imaxe, e facilita a visibilidade en exteriores con luz solar directa, onde os paneis OLED adoitan ofrecer peores resultados.
O Insta360 Mic Pro integra tres micrófonos por transmisor, combinados mediante procesamento dixital para simular distintos patróns polares. O usuario pode escoller entre modos omnidireccional, cardioide e figura de oito desde o receptor ou desde a aplicación móbil. O modo cardioide busca ofrecer un comportamento semellante ao dun micrófono de pistola cando se monta sobre unha cámara, mentres que o modo figura de oito está pensado para entrevistas e conversas entre dúas persoas.
O sistema incorpora cancelación de ruído mediante IA apoiada nun chip NPU dedicado, co obxectivo de reducir vento, ruído ambiental ou son de fondo, mantendo unha voz máis natural que nos sistemas convencionais de redución de ruído.
Outro dos elementos destacados é a gravación interna en formato flotante de 32 bits, unha funcionalidade orientada a evitar saturacións ou clipping en situacións nas que o volume cambia de maneira imprevisible. Esta tecnoloxía permite rexistrar desde sons moi baixos ata berros repentinos sen perda de información, facilitando posteriormente o axuste do audio na edición.
Cada transmisor integra ademais 32 GB de almacenamento interno para funcionar como copia de seguridade independente en caso de fallos na transmisión sen fíos ou na cámara. As gravacións divídense automaticamente en segmentos de 30 minutos para evitar limitacións de tamaño de ficheiro. Insta360 asegura tamén que a gravación estéreo interna é unha función pouco habitual neste tipo de dispositivos compactos.
O Insta360 Mic Pro sorprende cun modo que permite conectar ata catro transmisores a un único receptor mantendo pistas separadas. Tamén ten un modo que posibilita distribuír dous transmisores entre catro receptores simultaneamente, pensado para producións multicámara ou retransmisións.
A compatibilidade directa mediante Bluetooth con cámaras Insta360 como X5, X4 Air, Ace Pro 2 e GO Ultra permite prescindir do receptor en determinadas configuracións. Tamén se ofrece conexión mediante jack de 3,5 milímetros, USB-C ou Lightning para cámaras tradicionais e smartphones.
A autonomía anunciada alcanza as 10 horas por transmisor, ampliables ata 30 horas empregando o estoxo de carga. Unha carga rápida de cinco minutos proporciona ata unha hora adicional de uso.
O Insta360 Mic Pro tamén conta con sincronización de código temporal mediante oscilador TCXO, prometendo menos dun fotograma de desfase en 24 horas para facilitar a sincronización entre audio e vídeo en producións multicámara.
O sistema de micrófonos sen fíos está dispoñible a prezos que parten dos 109 euros para un transmisor individual. O kit con 1 transmisor e 1 receptor custa 209 euros, mentres que a configuración con 2 transmisores e 1 receptor ascende a 329 euros. A versión con 4 transmisores e 1 receptor sitúase nos 547 euros.

Vídeo de presentación do Insta360 Mic Pro

A Xunta regula cunha nova técnica a creación e xestión de documentos electrónicos

S. P. — 2026-05-19T18:00:00Z

A Xunta de Galicia vai regular a creación e xestión dos documentos electrónicos xerados pola actividade da Administración mediante unha nova norma técnica. Trátase dunha ferramenta, publicada este martes 19 de maio no Diario Oficial de Galicia que busca “garantir a autenticidade, fiabilidade e dispoñibilidade documental, o dereito de acceso e a conservación do patrimonio documental”.
Con este obxectivo, a política recolle, mediante doce epígrafes, os principios estratéxicos, os procesos de xestión documental, os axentes implicados e as responsabilidades, os instrumentos para a xestión e as directrices para a súa implantación.
Téñense en conta todas as partes da secuencia documental desde o seu nacemento ou creación ata a súa transferencia ao arquivo electrónico, ben para a súa conservación ou consulta como para a súa eliminación. Trátase dun ciclo de vida que inclúe a captura, o rexistro, a clasificación, a descrición, o acceso, a cualificación, a conservación, a transferencia e a eliminación.
As Consellerías de Cultura, Lingua e Xuventude e de Facenda e Administración pública forman parte dos axentes implicados nesta ferramenta, xunto aos órganos competentes na xestión de procedementos e servizos xeradores de documentos electrónicos e en materia de formación do persoal empregado público como son a Comisión de Seguridade e Goberno electrónico, o Consello de Avaliación Documental de Galicia e o Consello de Arquivos de Galicia.
A Xunta informou que “estes representantes participarán en procedementos periódicos de supervisión que verifiquen o correcto funcionamento da normativa, así como na súa revisión e actualización cando así se precise debido a modificacións lexislativas, melloras polo uso das novas tecnoloxías e novos casos de aplicación”.
Dende o Goberno galego tamén destacan os instrumentos para a xestión documental, entre os que se inclúen o catálogo de sistemas dixitais, o inventario de información administrativa, o catálogo de procedementos ou os servizos e de tipoloxías documentais.
Amais, inclúense ás directrices funcionais, tecnolóxicas, operativas e organizativas que permiten o éxito desta norma e os modelos tecnolóxicos, de dixitalización e de conservación, así como aspectos relativos ao ciclo de vida do documento electrónico, ao procedemento de destrución ou ao plan de xestión de riscos.
A Xunta conclúe lembrando que “este recurso busca facilitar e sistematizar o labor dos traballadores” e con este obxectivo “impulsarase que a formación de todo o persoal implicado na xestión de documentos electrónicos estea presente nos plans de formación continua da Administración”.

Game Pass incorpora unha manchea de xogos para rematar o mes

Redacción — 2026-05-19T17:30:00Z

Forza Horizon 6 encabeza a segunda vaga de incorporacións ao catálogo de Xbox Game Pass de maio, cun lanzamento que leva a serie de condución de mundo aberto a Xapón e incorpora máis de 550 vehículos reais nun mapa que se presenta como o máis grande da franquía. O xogo xa está dispoñible para nube, Xbox Series X|S, dispositivos portátiles e PC dentro de Game Pass Ultimate e PC Game Pass.
A actualización do servizo tamén incorpora propostas moi variadas, desde shooters cooperativos ata xogos de simulación, terror ou aventuras narrativas. Entre as novidades máis destacadas figura Jurassic World Evolution 3, que chegará o 2 de xuño e permitirá construír parques de dinosauros con novas opcións de personalización e xestión.
Tamén sobresae Escape Simulator, un título de quebracabezas en primeira persoa centrado en salas de escape cooperativas, dispoñible desde o 26 de maio para nube, Xbox Series X|S e PC.
O 20 de maio incorpóranse varios títulos ao catálogo, entre eles Dead Static Drive, unha aventura de terror e supervivencia inspirada na estética da América dos anos oitenta; Mi Amiga, Peppa Pig, orientado ao público infantil; Pigeon Simulator, un xogo cooperativo de extracción protagonizado por pombas; Remnant II, shooter cooperativo con combate corpo a corpo e a distancia; e Winter Burrow, unha proposta de supervivencia acolledora na que un rato regresa ao seu fogar da infancia.
O 21 de maio chegará Luna Abyss, unha aventura de acción en primeira persoa centrada na exploración dunha megastrutura subterránea cunha estética de horror cósmico.
A finais de mes sumaranse Echo Generation 2, un xogo de rol de construción de mazos con temática de ciencia ficción; The Outer Worlds: Spacer's Choice Edition, versión definitiva do xogo de rol de Obsidian; Crashout Crew, centrado no caos cooperativo nun almacén; e Kabuto Park, un xogo de colección de insectos ambientado nas vacacións de verán dunha nena.
Xa en xuño incorporarase tamén Final Fantasy VI, clásico xogo de rol xaponés ambientado nun mundo no que a maxia desapareceu tras a Guerra dos Magos.

StarFest FGC 2026: os xogos de loita conquistarán Vedra en novembro

Redacción — 2026-05-19T16:30:00Z

StarFest FGC volve en 2026 coa súa terceira edición e convértese na meirande fin de semana de xogos de loita en Galicia: tres días de competición, cinco torneos principais e unha bolsa de premios garantida de 1.500 euros desde o primeiro día.
O festival celebrarase do 6 ao 8 de novembro de 2026 na Estación de Vedra, un edificio reconvertido en espazo cultural. As acreditacións e as primeiras sesións de xogo libre comezan o venres 6; o sábado 7 acollerá as fases de pools dos cinco torneos e o domingo 8 disputarase o Top 8 en escenario, seguido da cerimonia de entrega de premios.

Torneos, formato e calendario

: O programa Galician Friki de AGalega.gal amosou como foi unha pasada edición da StarFest

Os cinco torneos principais anunciados son Street Fighter 6, Tekken 8, Marvel Tokon: Fighting Souls, Guilty Gear: Strive e 2XKO. Todos os eventos arrancan cun sistema de pools garantidos que asegura un mínimo de tres partidas por participante antes de pasar a un bracket de dobre eliminación ata o Top 8; se un xogador está inscrito en varios torneos, a organización coordinará as waves de pools para evitar solapamentos.
O horario do sábado inclúe apertura de portas pola mañá, pools ao longo da tarde e un horario nocturno exclusivo para asistentes con entrada de acceso completo.
A bolsa de premios suma 1.500 euros, garantida desde o primeiro día, e a súa distribución entre os cinco torneos determinarase en función do ranking de inscricións ao peche das mesmas; os importes por posición anunciados como referencia mostran, por exemplo, 300 euros para o primeiro clasificado no torneo con maior asistencia e 150 euros para o segundo nalgúns casos, con pagamentos en efectivo. As inscricións en start.gg son de balde e as entradas ao evento págase exclusivamente no despacho de billetes; o prezo dunha entrada de 1 día é de 10 euros e o acceso completo, que inclúe o horario nocturno, custa 15 euros.
As inscricións en liña pechan o luns 2 de novembro ás 11:30; a partir dese momento só será posible inscribirse en persoa o venres no recinto.

Actividades paralelas e normas

A organización completa a oferta competitiva con freeplays durante todo o evento, actividades como King of the Hill e Beat the Pro con premios directos, ladders e partidas casuais, photocall oficial e emisión en directo en Twitch e YouTube con comentaristas. O regulamento esixe check-in presencial antes do inicio de cada torneo, impón un prazo de 10 minutos para presentarse tras ser chamado a unha partida e prohibe o uso de modificacións non autorizadas de software ou hardware; calquera comportamento irrespectuoso pode supoñer descualificación e expulsión do recinto.
Ademais, os premios só se entregarán a quen estea presente ou mediante acordo previo coa organización, e os menores deberán presentar un formulario asinado polos seus titores legais para poder cobrar.
A organización anuncia que dará a coñecer os convidados da escena nacional antes do peche de inscricións en liña e que publicará proximamente unha listaxe de aloxamentos recomendados; os detalles finais sobre a repartición exacta dos prizepools faranse públicos o martes 3 de novembro ás 12:00.

A Deputación de Lugo lanza MencIA, unha estratexia propia de IA para a provincia

S. P. — 2026-05-19T16:00:00Z

A Deputación de Lugo presentou unha manchea de detalles sobre a estratexia MencIA, o proxecto propio de intelixencia artificial da Administración provincial para os vindeiros anos. MencIA, que será levada a pleno o 26 de maio para a súa aprobación definitiva, é en palabras da Deputación “unha innovación tecnolóxica para reforzar os servizos públicos e para acompañar aos concellos máis pequenos nun proceso que non se podería afrontar en solitario”.
Presentación
A presidenta da Deputación de Lugo, Carmela López, presentou esta mañá, no Pazo de San Marcos, MencIA: unha estratexia propia de intelixencia artificial para a provincia. Fíxoo acompañada polo Deputado de Promoción Económica e Social, Pablo Rivera Capón, e os xefes do servizo de Comunicación e TIC's e de Innovación e Participación Cidadá, Nicolás Fariña Verea e José Antonio Arias Lombardero. Encheron o Salón de Actos da sede provincial, traballadores e traballadoras da institución, Alcaldes e Alcaldesas dos diferentes concellos e outros responsábeis políticos.
“Este cambio xa está aquí. A intelixencia artificial vai transformar a maneira de traballar das institucións, e nós tiñamos claro que a Deputación de Lugo non podía quedar esperando a ver que facían os demais”, relatou a presidenta, ao tempo que explicou que desde a institución “tiñamos que prepararnos, pero facéndoo ao noso xeito: desde o público, con garantías, con control sobre os datos e pensando na realidade concreta desta provincia”.
A prol dos servizos públicos
López recordou que MencIA pon en xogo recursos que os concellos polas conta nunca poderían ter materializado na súa totalidade. A presidenta lembrou que a provincia de Lugo conta con 67 concellos, 66 deles están por debaixo dos 20.000 habitantes; “o que significa que falar aquí de intelixencia artificial é falar tamén de cohesión territorial e de igualdade de oportunidades”.
Conseguir que a transformación dixital non agrande a distancia entre territorios, senón que a reduza, "lograrémolo a través dun modelo propio, feito pola Deputación, baseado en código aberto e pensado para servir mellor aos nosos veciños e veciñas. Un modelo no que a supervisión humana segue sendo fundamental, no que os datos permanecen baixo control institucional e no que a transparencia forma parte do propio deseño da estratexia”. Destacou que o uso do galego era algo ao que non se podía renunciar, “porque a nosa lingua ten que estar tamén nos espazos onde se vai construír o futuro”.
Catro piares da IA da Deputación
O deputado e os técnicos explicaron que MencIA fundaméntase na idea de soberanía tecnolóxica realista, “de tal maneira que os datos sensíbeis non abandonen os servidores da institución”. Unha estratexia estruturada en catro piares: gobernanza e cumprimento, que fixa os principios reitores, os órganos de goberno e os mecanismos de control normativo; transformación dixital interna, que ten o seu núcleo no Laboratorio MencIA e na transformación da eficiencia dos servizos provinciais; IA ao servizo dos municipios, que materializa a competencia de asistencia aos concellos; e ecosistema territorial e innovación, que articula a colaboración co tecido institucional, universitario e empresarial galego.
A Deputación engadiu que MencIA será unha realidade, tamén, a través de dous eixos operativos, un interno que será o propio Laboratorio MencIA e un eixo territorial conformado polo Centro de innovación Territorial (CIT) da provincia de Lugo.
Laboratorio MencIA é a infraestrutura tecnolóxica propia da Deputación para o desenvolvemento e despregamento de sistemas de IA de código aberto. Laboratorio MencIA articúlase en tres compoñentes: un motor, a infraestrutura tecnolóxica que executa os modelos de IA; unhas mans, as aplicacións e asistentes que permiten interactuar co sistema; e un cerebro, o sistema que conecta todos os elementos para que funcionen de maneira coordinada.
Aplicacións e asistentes ao servizo do persoal
Laboratorio MencIA contará ademais con diferentes aplicacións que permitirán, nun máximo de tres interaccións, realizar tarefas mecánicas e complexas en moito menos tempo, facilitando o labor dos traballadores e traballadoras, para que poidan dedicarse a aquelas cuestións de alto valor. Entre algunhas das aplicacións que se expuxeron: un resumidor de documentos, un extractor de texto, transcritor de audio, un monitor de edictos do BOE, un xestor intelixente do correo electrónico, un almacén de instrucións, unha calculadora de prazos da Lei 9/2017 de Contratos do Sector Público, ou un analizador de convocatorias de axudas e subvencións.
Contará tamén cos chamados asistentes, chatbots especializados cos que o usuario interactúa mediante conversación natural. Unha das claves e que serán adestrados con instrucións de sistema específico e unha base de coñecemento pechada: non accede a Internet nin a información fóra do seu ámbito asignado. Puxeron como exemplo a un profesor de IA; outro para elaborar memorias xustificativas en contratos; outro de contratación pública en entidades locais; un asesor en función pública; un centro de atención a usuarios; un asistente de documentación e formación operativa; un creador de prompts para axudar aos usuarios para escribir instrucións claras e detalladas para outras ferramentas de IA; un arquitecto de asistentes personalizados; e un asistente analítico con procura web.
Un horizonte de catro anos
A Deputación explicou que MencIA terá un horizonte de implantación de catro anos, que comezará coa posta en produción das oito aplicacións e nove asistentes e a aprobación da estratexia no pleno. No segundo semestre do 2026 e comezos do 2027 está prevista a constitución do Comité de Gobernanza e os primeiros pilotos. Está previsto que o despregamento interno completo se produza entre o 2027 e o 2028; e de cara ao final dos catro anos este novo ecosistema estea consolidado.

O Concello de Vilagarcía e o Banco de España formarán á veciñanza en finanzas en liña

S. P. — 2026-05-19T15:30:00Z

A aula vilagarciá da Rede CeMiT (Centros para a Modernización e a Inclusión Tecnolóxica) acollerá en xullo un innovador curso titulado Finanzas para todos. En colaboración co Banco de España, no obradoiro abordaranse cuestións como a inflación, o diagnóstico das finanzas propias, os distintos sistemas de pago ou a protección fronte aos fraudes.
O prazo de inscrición ábrese o vindeiro luns, día 18, e poderá formalizarse ben presencialmente, na sede da rúa Matosinhos, en horario de 9:00 a 14:00 horas, ou ben a través da sede electrónica do Concello, na categoría Emprego. As prazas dispoñíbeis son corenta. A partir dese número establecerase unha lista de agarda.
O cursiño estrutúrase en dous itinerarios. O primeiro desenvolverase os días 8, 13 e 14 de xullo, en horario de 10:00 a 12:30. Na sesión inicial proporanse cuestións como o estado da “saúde financeira” do propio alumnado, de que maneira afecta a inflación aos nosos petos e como planificar as finanzas persoais en tempos de incerteza. Na segunda, as explicacións centraranse nos consellos prácticos sobre contas, tarxetas e outras formas electrónicas de pago e acerca das compras financiadas, incluídas as hipotecas. E na terceira, os temas de estudo serán a banca en liña, o comercio electrónico e Bizum, para concluír con a autoprotección fronte a ciberdelincuencia o e o fraude nas operacións financeiras cotiás.
O segundo itinerario ocupará os días 21, 22 e 27 de xullo, co mesmo horario, de 10:00 a 12:30. Na sesión inaugural falarase sobre billetes, moedas e inflación, como distinguir billetes e moedas lexítimos, deteriorados ou falsos, e os dereitos sobre as operacións con efectivo. Na segunda, os conceptos chave serán os pagos, os financiamentos e o portal do cliente do Banco de España, facendo un repaso sobre os recursos, ferramentas e simuladores que ofrece a citada institución bancaria. Por último, na terceira sesión volverase sobre as finanzas e a protección activa fronte aos fraudes e daranse consellos para a elaboración dun orzamento financeiro persoal.
Máis formación
O curso de Finanzas para todos é a principal novidade do novo ciclo formativo que o Concello, a través da Aula CeMIT, vai desenvolver dende xullo ata novembro. Unha oferta que inclúe instrución específica sobre programas populares de presentacións dinámicas como o Genially ou Canva (7 de setembro a 7 de outubro); LibreOffice de cálculo (mesmas datas que o anterior); Canva para principiantes: conceptos básicos (13 de outubro a 17 de novembro); a impresión 3-D (13 de outubro ao 2 de novembro); e banca dixital (16 a 18 de novembro). A inscrición ábrese tamén o luns 18 coas mesmas condicións xa ditas para o cursiño sobre finanzas. En todos os casos ten carácter gratuíto.

José Valiño e José Manuel García Oya recibirán o Premio Especial CPEIG-En Memoria de Hernán Vila

S. P. — 2026-05-19T15:11:14Z

O Colexio Profesional de Enxeñaría en Informática de Galicia (CPEIG) vai conceder o Premio Especial CPEIG-En memoria de Hernán Vila a José Valiño Blanco, director xeral de IT, Información, Procesos e Operacións de Abanca, e a José Manuel García Oya, socio director na compañía tecnolóxica galega Plexus Tech. A dobre condecoración será entregada no marco da XVIII Noite da Enxeñaría en Informática de Galicia 2026 que se celebra en Santiago o 12 de xuño.

José Valiño Blanco

: José Valiño Blanco

José Valiño Blanco é un directivo histórico de Abanca, ligado durante 27 anos á xestión tecnolóxica da entidade bancaria como director xeral de IT, Información, Procesos e Operacións (primeiro en Caixa Galicia, despois en Novagalicia Banco –fusión de Caixa Galicia e Caixanova– e finalmente en Abanca).
Natural da Coruña, é Enxeñeiro Superior Industrial pola Universidade Politécnica de Madrid, especializado en enerxía nuclear. Tamén realizou estudos de posgrao en Harvard, no MIT (Massachusetts Institute of Technology) e no Tuck School of Business do Dartmouth College. Foi consultor en diversas empresas (Arthur Andersen, Andersen Consulting e Europa Management Consulting) como profesional experto que brindaba asesoramiento especializado.
Segundo explica, Abanca consolidou a súa función tecnolóxica enfocándose na transformación dixital, a intelixencia artificial (IA) e a modernización das súas infraestruturas para mellorar a experiencia do cliente e a eficiencia operativa.
Por exemplo, a entidade destaca en ser pioneira en España en aplicar IA xenerativa para a atención ao cliente co asistente SOFia; dispón de Abanca Innova, con centros na Coruña e Vigo; conta co seu principal Centro de Procesamento de Datos (CPD) en Galicia; e foi o primeiro banco español en implantar tecnoloxía de chaves de acceso (passkeys) na banca móbil para reforzar a seguridade.
“O meu obxectivo foi xestionar ausencias e non deficiencias. Para mellorar de continuo a calidade do software e crear unha banca dixital avanzada, levamos desde 2013 realizando máis de dez integracións, o que aportou moita rendibilidade ao banco. Coa tecnoloxía producíronse resultados rapidamente e xeráronse beneficio, e sempre defendendo o carácter galego da empresa”, sinala.
Despois do verán converterase no decano executivo en Enxeñaría da Universidad Intercontinental de la Empresa (UIE) e tamén en responsable en tecnoloxía multinacional do grupo familiar.

José Manuel García Oya

: José Manuel García Oya

José Manuel García Oya (Vigo, 1960) formouse como técnico superior en Informática de Xestión, complementada con numerosos cursos especializados, tanto de carácter técnico como de xestión e organización no ámbito das TIC (Tecnoloxías da Información e a Comunicación).
Toda a súa carreira profesional, de máis de 40 años, estivo ligada fundamentalmente ao ámbito sanitario público e privado, comezando como programador, no seu momento, da Administración de Ambulatorios do INSALUD na provincia de Pontevedra, da que foi responsable de informática.
En 1991, trasladouse a Santiago para incorporarse a unha compañía TIC galega, desempeñando tarefas de analista e posteriormente de consultor TIC na Consellería de Sanidade e o Servizo Galego de Saúde, onde participou activamente na definición da Tarxeta Sanitaria de Galicia e na posta en marcha do Plan de Mellora Informática para todos os hospitais da rede do SERGAS.
En 1996 trasládase de novo, esta vez a Madrid para colaborar co Ministerio de Sanidad e o INSALUD na organización da función TIC e na definición dos principais proxectos tecnolóxicos de ambos organismos, con especial relevancia na definición e posterior dirección executiva do Plan de Renovación Tecnolóxica dos 82 hospitais e os 1.430 centros de saúde, “un fito importante e de gran éxito en todas as comunidades do INSALUD”, destaca García Oya. Tamén participou activamente no Plan 2000 e no plan das transferencias tecnolóxicas do INSALUD ás comunidades autónomas.
No 2002 regresa a Galicia, e despois dun tempo incorporouse a finais de 2007 na que hoxe é a súa casa, Plexus Tech, onde tivo a responsabilidade de crear a práctica de Sanidade nun momento de forte expansión da compañía, desenvolvendo tarefas de dirección da área e apoio ao CEO, Antonio Agrasar, na coordinación das áreas de negocio, conseguindo situar algúns dos produtos de desenvolvemento propio de Plexus na primeira liña a nivel nacional e internacional. Actualmente, García Oya ocupa tarefas de apoio ao CEO e a representación institucional da compañía.
“Nestes últimos 40 anos, a evolución das TIC en Galicia, para alguén que comezou a traballar con tarxetas perforadas e ordenadores que ocupaban habitacións enteiras, é sinxelamente espectacular, tanto no ámbito das infraestruturas, as redes de comunicación ou o software e, en paralelo, o desenvolvemento dun ecosistema de empresas que inicialmente era moi reducido e de tamaño moi contido, e que hoxe en día ten un tamaño e unha presenza importante a nivel local e global”, indica.
Segundo argumenta, esta revolución informática non se limitou unicamente ás empresas, senón que transformou tamén a sociedade galega, permitindo novas formas de comunicarse e relacionarse e acceder á información. “A dixitalización das empresas e a administración pública permitiron achegar os servizos á cidadanía, reducindo barreiras xeográficas nunha comunidade como a nosa que se caracteriza por unha importante dispersión dos núcleos de poboación. Hoxe en día podemos dicir que, sen lugar a dúbidas, a evolución das TIC en Galicia foi un elemento clave de progreso, innovación e cohesión territorial que a sitúa no primeiro nivel nacional e internacional”, destaca.

Dúas traxectorias moi destacadas

A Noite do CPEIG recoñecerá este ano as traxectorias de José Valiño, histórico director de Tecnoloxía de Abanca, e de José Manuel García Oya, “Pucho”, figura clave no crecemento de Plexus Tech, “pola súa contribución decisiva ao desenvolvemento e consolidación do ecosistema tecnolóxico galego”.
“Rendemos homenaxe a dous profesionais que, desde ámbitos diferentes, pero complementarios, axudaron a situar a Galicia como un territorio de referencia en innovación e tecnoloxía. Dúas traxectorias marcadas pola visión estratéxica, o compromiso co talento e unha firme vontade de contribuír ao crecemento do sector tecnolóxico galego”, destaca o presidente do CPEIG, Fernando Suárez.
O presidente do Colexio sinala que ambos representan dous perfís fundamentais para entender a evolución do sector TIC en Galicia durante as últimas décadas: “A capacidade de impulsar grandes procesos de transformación tecnolóxica desde organizacións líderes e, ao mesmo tempo, a creación dun tecido empresarial innovador capaz de xerar talento, emprego cualificado e coñecemento desde Galicia cara o mundo”.
No caso de José Valiño, Suárez explica que o recoñecemento pon en valor unha traxectoria profundamente ligada á modernización tecnolóxica do sector financeiro galego. Desde a súa responsabilidade ao fronte da área tecnolóxica de Abanca, Suárez apunta que contribuíu a consolidar capacidades tecnolóxicas de primeiro nivel e a converter a tecnoloxía nun elemento estratéxico para a competitividade da entidade. “A súa visión axudou ademais a fortalecer un ecosistema de colaboración con empresas e profesionais galegos, exercendo un importante efecto tractor sobre o conxunto do sector TIC”, argumenta.
Pola súa parte, Suárez sinala que José Manuel García Oya simboliza o espírito emprendedor e a aposta por construír desde Galicia unha compañía tecnolóxica de referencia. A través de Plexus Tech, o presidente do CPEIG lembra que impulsou un modelo empresarial baseado na innovación, as persoas e o talento, demostrando que era posible desenvolver proxectos tecnolóxicos competitivos con impacto nacional e internacional sen renunciar ás raíces galegas. “A propia compañía definiuno como un gran piar de Plexus porque, por enriba de todo, cre no valor das persoas”, lembra.
José Valiño Blanco e José Manuel García Oya recollerán o galardón na gala da XVIII Noite da Enxeñaría en Informática de Galicia que se celebrará o 12 de xuño no Hotel OCA Porta do Camiño de Santiago. O evento é un punto de encontro entre as colexiadas e colexiados do CPEIG e un gran número de empresas e profesionais TIC de Galicia, que conta cunha destacada participación de cargos empresariais, institucionais e políticos.

LG prepara un monitor gaming capaz de operar a 1.000 Hz

Redacción — 2026-05-19T11:00:00Z

LG anunciou o que presenta como o primeiro monitor para xogos con resolución Full HD (1.920 x 1.080 píxeles) capaz de funcionar cunha taxa de refresco nativa de 1.000 Hz. O novo UltraGear 25G590B aposta por levar ao límite a fluidez e a capacidade de resposta en títulos competitivos, especialmente nos shooters en primeira persoa, onde a rapidez de reacción e a precisión son determinantes.
A pantalla, de 24,5 polgadas, emprega un panel IPS e consegue actualizar a imaxe 1.000 veces por segundo sen necesidade de reducir a resolución. Trátase dunha diferenza importante respecto doutras propostas recentes de Samsung ou Acer.
As altas taxas de refresco reducen a sensación de atraso na pantalla, melloran a claridade dos obxectos en movemento e minimizan o motion blur e os pequenos saltos na imaxe. Tamén diminúe o tempo entre unha acción física (como mover o rato ou premer unha tecla) e a súa representación visual. Aínda que actualmente moitos monitores para xogos sitúanse entre os 240 e os 360 Hz, os 1.000 Hz continúan sendo unha cifra moi pouco habitual e orientada sobre todo ao ámbito competitivo profesional.
LG dirixe este modelo ao mercado dos eSports e aos xogadores máis esixentes coa latencia e a velocidade de resposta. O monitor incorpora unha base compacta para ocupar menos espazo no escritorio, soporte con axustes de altura e inclinación, iluminación configurable e mesmo un gancho integrado para colgar auriculares.
Tamén suma funcións de intelixencia artificial integradas no propio dispositivo, como AI Scene Optimization, que adapta automaticamente a configuración da imaxe segundo o xénero do xogo, e AI Sound, orientado a ofrecer audio espacial.
Polo momento non se coñece o prezo oficial nin a data concreta de lanzamento, aínda que LG prevé comercializalo durante a segunda metade de 2026.

O Ministerio de Sanidade e a USC impulsan a 1ª microcredencial universitaria sobre IA aplicada á saúde

S. P. — 2026-05-19T10:45:00Z

O Ministerio de Sanidade e a Universidade de Santiago de Compostela, a través da cátedra USC Plexus de IA en Medicina Personalizada de Precisión (CAMELIA), impulsa a Microcredencial Universitaria en Intelixencia artificial aplicada á Saúde: fundamentos, regulación e casos de uso no Sistema Nacional de Saúde, unha iniciativa orientada a fortalecer as capacidades do ecosistema sanitario no ámbito da IA.
As ditas entidades informan que tras o interese suscitado por esta primeira convocatoria, está prevista unha segunda edición da microcredencial en outubro de 2026. “A Estratexia de Intelixencia artificial do SNS identifica a formación e a capacitación como un elemento clave para a incorporación cohesionada e equitativa das solucións de IA ao sistema público”, sinala a directora xeral de Saúde Dixital e Sistemas de Información para o SNS, do Ministerio de Sanidade.
“A medicina estará cada vez máis apoiada pola intelixencia artificial, pero non será mellor se os profesionais sanitarios non están preparados para usala”, destaca o director da Cátedra, Senén Barro.
Pola súa banda, Antonio Agrasar, director executivo (CEO) de Plexus Tech, explica que “o reto non é só desenvolver tecnoloxía, senón lograr que se utilice con coñecemento e criterio. Esta microcredencial é un paso fundamental para achegar a intelixencia artificial á práctica sanitaria”.
Engaden que o programa aborda desde “unha perspectiva práctica e aplicada” aspectos clave relacionados coa adquisición e o uso da intelixencia artificial no sistema público de saúde, incluíndo casos de uso reais, experiencias de desenvolvemento propio nos servizos de saúde, modelos de gobernanza da IA no Sistema Nacional de Saúde e cuestións regulamentarias, éticas e de despregamento.
O perfil de asistentes é principalmente de responsábeis e persoal de xestión, facultativos e especialistas en transformación dixital do ámbito sanitario público.
Esta microcredencial conta coa participación de profesorado e relatores procedentes de distintas institucións e organizacións de referencia, entre elas responsábeis do ámbito de saúde dixital do Ministerio de Sanidade a USC, a Axencia Española de Medicamentos e Produtos Sanitarios (AEMPS), o Centro Nacional de Certificación de Produtos Sanitarios (CNCps), e profesionais con experiencia práctica en despregamento e gobernanza de IA aplicada á saúde.
Con esta iniciativa, a Cátedra CAMELIA quere reforzar o seu compromiso “coa xeración de coñecemento, a capacitación especializada e o impulso dunha adopción consciente, segura e útil da intelixencia artificial no ámbito sanitario”.

O Industry Day do CITMAga mostrará os avances da firma eólica Instra grazas á IA

S. P. — 2026-05-19T10:33:01Z

O CITMAga (Centro de Investigación e Tecnoloxía Matemática de Galicia) celebra este venres 22 de maio o seu XV Foro de Interacción Matemática Industria (Industry Day), que reunirá a investigadores matemáticos e a representantes de empresas nacionais e internacionais, que amosarán como as matemáticas están a resolver problemas actuais que afectan á industria. Entre as empresas participantes figura Instra Ingenieros, unha firma de servizos de arquitectura, enxeñaría e consultoría con sedes na Coruña, Vigo, en diferentes puntos de España, ademais de China, Colombia e México; e con proxectos nos cinco continentes.
A súa especialización concéntrase nos sectores industrial, distribución e loxístico, así como nos ámbitos enerxético e retallista.
O seu director executivo (CEO), Pedro Pérez Gabriel, afirma que nos proxectos de enxeñaría están sempre presentes os matemáticos: “Traballamos en proxectos de sostibilidade industrial e portuaria onde aplicamos métodos matemáticos que nos permiten seleccionar as mellores medidas para reducir as emisións de CO2, tendo en conta ademais o seu custo económico e o impacto social, entre outras variábeis”.


Pedro Pérez, CEO de Instra

No transcurso do evento, Pérez Gabriel presentará igualmente solucións en enerxías renovábeis, en particular o proxecto Makemake: “Facemos uso e adestramento de algoritmos de intelixencia artificial, deseñados especificamente para procesar datos visuais como imaxes ou vídeos, co fin de identificar aves nos parques eólicos e así reducir o risco de impacto na avifauna nestas infraestruturas enerxéticas”, explica o directivo de Instra, que considera “esenciais” aos matemáticos pola súa formación en métodos numéricos e estatísticos, “ferramentas fundamentais para modelar problemas complexos e resolvelos a nivel computacional. Ademais, di, “posúen a capacidade e a formación en lóxica que os leva a adaptarse ben no mundo do software e da intelixencia artificial”.
E engade: “Creo que as matemáticas e a IA axudarannos -como xa o fixeron no pasado a ciencia e a tecnoloxía- a resolver problemas que nos impactan, como a necesidade de fontes de enerxía sostibles, a redución de emisións contaminantes ou a atopar remedio ás doenzas”.

Vitae mostra aos propietarios de produto como usar a IA para aumentar en axilidade

S. P. — 2026-05-19T09:35:16Z

Esta primavera proseguen as actividades formativas de Vitae Consultores, referente galego e estatal na transformación tecnolóxica das empresas e na adaptación das e dos profesionais aos novos xeitos (máis eficaces, eficientes, áxiles e produtivos) de traballar, comunicarse ou xestionar recursos. Precisamente a axilidade será un dos piares temáticos do Curso en Aberto Axilidade Avanzada: IA aplicada a Product Owners, que celebra Vitae os días 16 e 18 de xuño en formato de aula virtual, con seis horas lectivas.
O curso porá o foco na figura product owner ou propietario de produto, o rol clave na metodoloxía Scrum que se encarga de maximizar o valor dun produto.
A idea é facilitar o seu día comezando pola información: “Vivimos nunha contorna onde os product owners reciben máis información que nunca: feedback de usuarios, métricas, opinións de stakeholders… pero transformar todo iso en decisións claras segue sendo un reto”, informa Vitae, puntualizando que o dito desafío pode abordarse botando man da intelixencia artificial xenerativa, que “abre unha nova forma de traballar”.
De feito, nesta formación práctica aprenderemos a utilizar ferramentas como ChatGPT, Gemini ou Copilot para analizar feedback, descubrir valor real, xerar hipótese de produto e construír un product backlog con criterio.
Ademais, poderemos ir un paso máis aló: “Aprenderemos a deseñar prompts efectivos e a crear os teus propios asistentes de IA adaptados ao noso día a día como product owner; e todo iso a través dun caso práctico realista onde traballaremos como PO desde o primeiro minuto”, engaden dende Vitae.

Obxectivos

-Utilizar IA xenerativa para analizar feedback de usuarios e detectar problemas reais.
-Transformar problemas en hipóteses de produto con valor.
-Crear historias de usuario claras e estruturadas.
-Construír e priorizar un product backlog con criterio.
-Deseñar prompts efectivos utilizando técnicas como Zero-shot, Few-shot, Chain of Thought, etc.
-Crear asistentes de IA personalizados para o traballo como product owner.
O curso vai dirixido a product owners que queren mellorar a súa capacidade de decisión e priorización, especialistas en Scrum que desexen entender como aplicar IA en produto, xestores de produto e perfís de negocio involucrados en decisións de produto, e equipos áxiles que queiran incorporar a IA no seu día a día.

Formadores

Pío Puig
Pío Puig é un consultor e formador especializado en transformación organizativa, cunha traxectoria centrada en axudar a equipos a tomar mellores decisións e xerar impacto real. A súa traxectoria combina unha base técnica sólida —enxeñeiro e MBA— cunha evolución cara ao desenvolvemento do talento, o que lle permite moverse con solvencia entre o mundo tecnolóxico e o humano. Traballou en contornas de Data Science e Machine Learning, aplicando IA en contextos reais de negocio. O seu enfoque combina criterio de produto, pensamento estratéxico e uso práctico de IA xenerativa. Certificado en Agile e Scrum (PSM I, PAL I) e certificacións en IA aplicada de Microsoft e fundador de TalentUp! e Fast Innovation.

Susanna Miquel
Susanna Miquel é unha consultora estratéxica especialista en desenvolvemento de persoas, liderado e acompañamento a equipos. Con formación de base como arquitecta pola UPC, evolucionou a súa carreira cara ao ámbito organizativo, especializándose no desenvolvemento do talento e liderado consciente, o que lle permite achegar unha visión estruturada (enxeñería/arquitectura) combinada con enfoque humanista. O seu enfoque achega a dimensión clave en calquera proceso de innovación: as persoas, a aliñación e a capacidade real de executar. Conta con certificacións oficiais en Agile e Scrum (PSM I, PAL I) e certificacións en IA aplicada de Microsoft e é fundadora de TalentUp! E Fast Innovation.

Un de cada tres maiores de 75 anos xa usa Internet a diario

S. P. — 2026-05-19T08:25:37Z

A operadora Adamo vén de compartir datos sobre a evolución positiva do uso das novas ferramentas tecnolóxicas entre a poboación sénior, unha franxa de idade que ten un especial protagonismo entre a súa clientela, xa que Adamo é unha operadora moi envorcada no rural (no rural de Lugo xa está preto de cubrir o 90% dos concellos coa súa rede ultrarrápida de alta velocidade, abranguendo máis de 100.000 fogares xa).
Adamo lembra que os datos demostran que “as persoas maiores non queren quedarse atrás na súa incorporación á tecnoloxía” e que así o constatan os máis recentes datos ofrecidos polo Instituto Nacional de Estatística (INE), relativos a 2025 e que Adamo analizou con motivo do Día da Internet, celebrado o pasado domingo, 17 de maio.
Deste xeito, un de cada tres maiores de 75 anos xa utiliza Internet a diario, tal e como indican desde o INE. Ademais, a porcentaxe dispárase ao 83% na franxa de entre 65 e 74 anos.
Adamo recolle da información do INE que máis do 96% da poboación de 16 a 74 anos conectouse nos tres últimos meses (0,5 puntos máis que en 2024) e o 92,5% usouno acotío, ou sexa a diario (1,0 puntos máis). Pola súa banda, case o 60% mercou por Internet nos tres últimos meses por motivos particulares, 2,9 puntos máis que na enquisa anual precedente.
Por sexo, as mulleres presentaron porcentaxes lixeiramente superiores aos homes: 0,4 puntos máis no uso da internet nos tres últimos meses, 1,5 puntos máis no uso diario e 1,1 puntos máis nas compras en liña.
As comunidades autónomas con maior porcentaxe de usuarios da internet e de persoas que compraron na Rede nos tres últimos meses foron a Comunidad de Madrid (98% e 65%, respectivamente), Cataluña (case o 98% e 65% en cada caso) e Baleares (máis do 97% e preto do 64% en cada campo), segundo consta no estudo do INE que destaca Adamo.
Adamo co rural
A operadora aproveitou a celebración do Día de Internet para referendar o seu compromiso co rural, envorcando esforzos para lograr que a conectividade das vilas e aldeas poida aproximarse, ou mesmo poida igualarse, á que existe nas cidades.
A compañía xa ten conectados á súa rede de fibra óptica máis de 3,2 millóns de fogares de 2.400 municipios -preto de 1 de cada 3 concellos españois-, despregando máis de 70.000 quilómetros de fibra, sobre todo en localidades rurais da práctica totalidade das comunidades autónomas peninsulares.
Ademais, o obxectivo de Adamo non só é reducir a fenda dixital entre as zonas máis rurais e illadas e as áreas urbanas, “senón tamén facelo de maneira sostíbel, respectando e apoiando a contorna no que opera”.

PlayStation deixará de lanzar en PC os seus xogos narrativos

Redacción — 2026-05-18T20:00:00Z

: Nos últimos anos PlayStation puxo á venda para PC os seus grandes xogos para un xogador

Bloomberg asegura que Sony está a dar marcha atrás na súa política de publicar en PC os grandes xogos de PlayStation, recuperando unha estratexia centrada na exclusividade para consola que durante décadas definiu a marca. Os plans actuais pasan por manter en PlayStation 5 títulos para un único xogador como Ghost of Yotei ou Saros, abandonando a intención de levalos tamén a Steam e outras plataformas de PC. Esta información tería sido comunicada aos traballadores dos estudios de PlayStation por parte do seu director xeral, Hermen Hulst.
A mudanza suporía un cambio relevante respecto da política de publicación iniciada en 2020, cando PlayStation comezou a adaptar a PC algunhas das súas franquías máis recoñecibles, como God of War ou The Last of Us. Dende entón, a presenza de xogos de Sony en PC foi aumentando, aínda que cun calendario irregular e sen unha política especialmente clara sobre tempos de exclusividade ou compatibilidade entre plataformas.
As fontes consultadas aseguran que os xogos multixogador e de servizo continuarán apostando pola distribución multiplataforma. Proxectos como Marathon ou Marvel Tōkon seguirían chegando tanto a consola como a PC, mentres que as producións narrativas e centradas na experiencia individual quedarían ligadas ao ecosistema PlayStation.
Internamente existiría preocupación por un posible impacto negativo sobre a marca PlayStation e sobre as vendas de hardware. Parte dos directivos considerarían que lanzar os principais xogos en PC reduce o atractivo diferencial da consola, especialmente nun momento no que Sony prepara a transición cara ás futuras xeracións de hardware.
O rendemento comercial dalgúns lanzamentos recentes en PC tamén influiría nesta decisión. Varias adaptacións non acadaron as expectativas previstas, mentres que determinadas medidas, como a obrigatoriedade de empregar contas de PlayStation Network en títulos distribuídos a través de Steam, xeraron críticas entre os usuarios de PC.
O escenario competitivo tamén mudou nos últimos anos. Nintendo continúa apostando por unha política case totalmente pechada arredor de Switch e das súas franquías propias, mentres Microsoft evolucionou cara a unha estratexia claramente multiplataforma, publicando os seus xogos tanto en Xbox como en PC e, cada vez máis, tamén en PlayStation.
Outro elemento que estaría condicionando os plans de Sony sería a futura Xbox baseada en Windows que diversos rumores levan meses anticipando. A posibilidade de que a vindeira consola de Microsoft execute xogos de PC de maneira nativa abriría a porta a ver franquías históricas de PlayStation funcionando en hardware rival, un escenario que xeraría reticencias dentro da división de videoxogos de Sony.

Altia impulsa o novo portal institucional da Comunidad de Madrid

S. P. — 2026-05-18T20:00:00Z

A Comunidad de Madrid presentou o seu novo portal institucional, unha plataforma renovada en cuxa evolución tecnolóxica, deseño e desenvolvemento integral traballou directamente a empresa galega Altia.
Concretamente, a firma tecnolóxica de Oleiros abordou a renovación completa da experiencia dixital do portal, mellorando tanto a navegación e usabilidade para a cidadanía como a xestión de contidos para os equipos internos.
Ademais, levou a cabo a migración á última versión de Drupal e o desenvolvemento integral da nova plataforma.
O proxecto tamén incluíu un estudo específico orientado ao uso masivo do portal, co obxectivo de optimizar o rendemento e garantir a máxima concorrencia nun dos principais puntos de acceso dixital da Comunidad de Madrid. Como parte desta evolución, Altia integrou os desenvolvementos nunha infraestrutura tecnolóxica máis resiliente e con maior fiabilidade baseada en Openshift. Para isto, a empresa galega contou cun equipo multidisciplinar de máis de dez profesionais expertos en deseño, UI/UX, arquitectura Drupal, tecnoloxías de procura avanzada e integración continua.
Altia tamén amplicou IA nos procesos de desenvolvemento mediante modelos adaptados a este tipo de proxectos e tecnoloxías, “o que nos permitiu optimizar tarefas, axilizar procesos e mellorar a eficiencia nas distintas fases de construción e evolución de plataformas dixitais”, explicou a empresa, lembrando que a colaboración coa Comunidade de Madrid vén de antigo e remóntase a hai máis dunha década de colaboración en proxectos vinculados a portais dixitais e Administración Electrónica. “Durante este tempo, acompañamos a evolución tecnolóxica desde as plataformas anteriores ata a implantación e evolución de Drupal, consolidándonos como un dos socios tecnolóxicos de referencia neste ámbito”, apuntaron fontes de Altia, que, ademais de materializar o portal institucional, liderou iniciativas relacionadas con algúns dos principais portais da Administración madrileña, entre eles a sede electrónica, o BOCM, o Portal de Contratación, o Portal de Transparencia, a Sede Xudicial Electrónica e os máis de 30 portais hospitalarios da rexión.

X limita o número de publicacións que poden facerse ao día sen pagar

Marcus Fernández — 2026-05-18T19:30:00Z

: X detalla os novos límites de uso nas súas páxinas de axuda

Ao pouco de que Elon Musk tomase as rendas de Twitter foron moitos os cambios na plataforma consecuencia dos recortes a nivel de infraestrutura, como cando se chegou a limitar o número de chíos que podían lerse por día. Esta cantidade era diferente entre os usuarios de balde e os usuarios de pagamento, e aínda que esta medida se anunciaba como temporal, rematou converténdose nunha política de límites establecida.
Nos últimos tempos os límites de X eran de 500 mensaxes directas ao día, 2.400 publicacións/republicacións ao día, 400 seguidos ao día e tamén outros límites de seguimento doutras contas unha vez superados os 5.000 seguidos. Aínda que moitas destas limitacións son claramente razoables, e buscan principalmente evitar certas malas prácticas, a política de publicacións vén de mudar, e as novas limitacións poden resultar un problema para os usuarios máis activos, xa que a partir de agora as contas que non paguen pola verificación só poderán realizar 50 publicacións ao día e 200 respostas.
Aínda que os límites poden parecer bastante elevados para un usuario ordinario, pode haber momentos puntuais nos que resulte natural superalos e, no caso de empresas e medios de comunicación isto podería ser moi habitual, polo que practicamente se está forzando a moitos usuarios a pasarse a un plan de pagamento se non queren ver limitada a súa capacidade de interactuar en X. Estamos ante unha práctica que ningunha outra plataforma social xeralista ousou facer, polo que non sería unha sorpresa que finalmente se botasen a compañía de Elon Musk se botase para atrás de detectar que tal política ten un efecto pernicioso.

Carballo aposta pola creatividade cunha nova edición de campamentos tecnolóxicos de verán

S. P. — 2026-05-18T19:21:21Z

A Concellaría de Innovación de Carballo desenvolverá este verán unha ampla programación de campamentos tecnolóxicos na Aula CeMIT local, unha iniciativa enmarcada nos obxectivos do proxecto Talento km 0 (TALK0) e deseñada para que a rapazada de entre 7 e 14 anos desenvolva as súas competencias dixitais “dun xeito lúdico e práctico”, informou o Concello.
O obxectivo da proposta é “fomentar o pensamento lóxico, a creatividade e o uso consciente da tecnoloxía mediante o xogo e a experimentación”.
O concelleiro de Innovación, Iván Andrade, destacou a importancia desta oferta formativa: “O noso obxectivo é que a mocidade de Carballo non sexa só consumidora de tecnoloxía, senón que aprenda a ser creadora, proporcionándolles ferramentas que lles dean autonomía e seguridade no mundo dixital actual”.
A oferta divídese en catro campamentos independentes de 10 días de duración cada un, con grupos reducidos dun máximo de 14 alumnos/as para garantir unha atención personalizada:
-Pequenos exploradores (7-8 anos): un primeiro contacto coa tecnoloxía a través de historias dixitais, debuxo, animación e robótica básica.
-Futuros exploradores (9-10 anos): centrado na programación visual con Scratch e o deseño de videoxogos sinxelos.
-Futuros makers (11-12 anos): introduciranse conceptos máis avanzados como o deseño 3D e a intelixencia artificial para nenos/as.
-Makers avanzados (13-14 anos): orientado a adolescentes, con contidos sobre edición de vídeo, creación de páxinas web e ciberseguridade.
Os campamentos desenvolveranse de 10:00 a 13:00 horas, de luns a venres, nas seguintes datas: Pequenos exploradores: do 6 ao 17 de xullo; Futuros exploradores: do 20 ao 31 de xullo; Futuros makers: do 3 ao 14 de agosto; e Makers avanzados: do 17 ao 28 de agosto.
Cada participante poderá inscribirse nun único campamento, e terán prioridade aquelas persoas que non asistiran en edicións anteriores. O prazo estará aberto a partir do luns 18 de maio ata esgotar prazas. As familias interesadas poden anotarse a través da páxina web da Aula CeMIT ou nas oficinas municipais do segundo andar do Fórum Carballo.

Desestiman a demanda de Elon Musk contra OpenAI

Redacción — 2026-05-18T17:50:52Z

Un xurado de California desestimou por unanimidade a demanda presentada por Elon Musk contra OpenAI, Sam Altman, Greg Brockman e Microsoft, ao considerar que as reclamacións foron presentadas fóra do prazo legal establecido.
O litixio xiraba arredor da transformación de OpenAI nunha estrutura con fins lucrativos. Musk acusaba os seus antigos socios de «roubar unha organización benéfica» mediante a creación dunha filial comercial arredor do laboratorio de intelixencia artificial, argumentando que se traizoara a misión orixinal da entidade de desenvolver IA para beneficio da humanidade. O empresario aseguraba tamén que Altman o enganara ao aceptar as súas achegas económicas e modificar posteriormente a orientación da organización.
Durante o xuízo analizouse en profundidade a relación entre os fundadores de OpenAI e os compromisos asumidos nos primeiros anos da entidade, mais o xurado concluíu que os posibles prexuízos sufridos por Musk producíranse antes do límite temporal permitido pola lexislación para presentar este tipo de demandas.
A xuíza Yvonne Gonzalez Rogers asegurou tras coñecerse o veredicto que existían probas abondosas para apoiar a decisión do xurado e que estaba preparada para arquivar o caso inmediatamente.
O proceso converteuse nun dos principais focos de presión xudicial sobre OpenAI nun momento clave para a compañía, que prepara unha posible saída a bolsa. Coa resolución do caso desaparece tamén unha das principais ameazas legais sobre a reorganización empresarial da compañía responsable de ChatGPT.

PlayStation Plus inicia unha suba de prezos

Marcus Fernández — 2026-05-18T17:35:16Z

No actual escenario de subas de prezo no mercado dos videoxogos sorprende pouco que Sony anuncie un cambio nas condicións do servizo PlayStation Plus, que a partir do mércores mudará subirá de prezo para novos subscritores, de xeito que a súa cota mensual pasará a custar un mínimo de 9,99 euros, mentres que a subscrición trimestral máis económica custará 27,99 euros. Cómpre salientar que, polo momento, os actuais subscritores non están suxeitos ao cambio de prezo.
Sorprende bastante o anuncio realizado con tan pouca antelación aducindo as condicións do mercado actuais (argumento que no ámbito dos videoxogos viña empregándose para o hardware, non para os servizos), aínda que tamén cómpre indicar que a suba é moderada (1 euro ao mes).
Un motivo que podería xustificar o momento do cambio de condicións de PlayStation Plus sería que é medio ano antes do lanzamento de Grand Theft Auto VI, forzando a que os xogadores do que promete ser o título máis importante do ano estean afectados polo novo marco de prezos.

Datos persoais de centos de milleiros de usuarios de autoescola poderían terse filtrado

Redacción — 2026-05-18T17:01:37Z

Unha presunta brecha de seguridade en Matferline, un dos principais provedores tecnolóxicos do sector das autoescolas en España, podería ter exposto os datos persoais de 703.450 estudantes segundo unha alerta difundida pola conta especializada en intelixencia de ameazas Hackmanac, que atribúe o ataque ao actor coñecido como macaroni e apunta ao uso dunha vulnerabilidade de inxección SQL (SQLi) para acceder ás bases de datos da compañía.
A información filtrada incluiría nomes completos, números de DNI, enderezos de correo electrónico, teléfonos móbiles, nomes de usuario, fotografías de perfil e mesmo contrasinais almacenados en texto plano. O incidente permanece pendente de verificación oficial, pero a gravidade potencial da filtración situou o caso no foco da comunidade de ciberseguridade.
Matferline ocupa unha posición central no ecosistema tecnolóxico das autoescolas españolas. Os seus sistemas serven de base para plataformas de test teóricos, software de xestión e materiais didácticos empregados por milleiros de centros de formación viaira. Isto implica que unha vulnerabilidade nun único provedor podería traducirse nunha exposición masiva de datos distribuídos por practicamente todas as provincias do país.
O aspecto máis preocupante da suposta filtración é a presenza de contrasinais en texto plano. A ausencia de cifrado ou hash nas claves de acceso representa un incumprimento das prácticas básicas de seguridade informática, xa que facilita o acceso inmediato ás contas comprometidas e incrementa o risco de reutilización de credenciais noutros servizos.
A combinación de DNI, teléfono, correo electrónico e contrasinais crea un escenario especialmente delicado para os afectados. Os datos poderían empregarse para campañas de phishing altamente personalizadas, fraudes por SMS, roubos de identidade ou intentos de acceso automatizado a outras plataformas nas que os usuarios empregasen a mesma clave.
Ata o momento non transcendeu ningunha comunicación pública detallada por parte de Matferline sobre o alcance real do incidente nin sobre posibles medidas de mitigación. Tampouco consta unha confirmación oficial da autenticidade da base de datos presuntamente extraída polos atacantes.

O MEGA rende homenaxe este venres á música, aos videoxogos e ao espírito friki

S. P. — 2026-05-18T14:30:00Z

Este venres, 22 de maio, os seareiros da música e dos videoxogos teñen unha cita no MEGA (A Coruña) onde se xuntarán os devanditos dous mundos máis a gastronomía e o que se coñece como mundo friki.
En concreto, a partir das 21.00 horas o Museo de Estrella Galicia propón unha cea maridaxe inspirada no cinema, os videoxogos, a animación e a literatura de culto.
A cita consistirá nunha cea maridaxe con cervexas da casa e as mellores receitas a cargo de Terra Food, que contará, tamén, con música en directo, a cargo dunha mestra de cerimonias moi especial: a coñecida pianista e streamer Elesky, que conta con centos de miles de seguidores nas redes sociais.
A asturiana visitará de novo a Sala de Degustacións do Museo de Estrella Galicia para interpretar algunhas das bandas sonoras máis coñecidas do mundo do cinema e dos videoxogos máis relevantes da denominada cultura friki.
O menú incluirá pratos inspirados en iconografía recoñecible para os afeccionados ao lecer dixital e á cultura geek, con referencias a mundos postapocalípticos, dragóns ou aventuras espaciais. Entre as elaboracións figuran un ceviche acompañado dunha DDH Dobre IPA, langostinos en tempura de carbón activo ou unha costela glaseada con redución de Nuka-Cola, nunha combinación que mestura técnicas culinarias contemporáneas e estética inspirada nos videoxogos.
A actividade súmase na celebración mundial do Día do Orgullo Friki (internacionalmente celebrado cada 25 de maio).
A cita no Museo de Estrella Galicia da Coruña será este venres 22, a partir das 21.00 horas, e as últimas entradas están dispoñíbeis na web oficial do museo.

O FabLab ETSAC da UDC intégrase na rede internacional de laboratorios de fabricación dixital da MIT

S. P. — 2026-05-18T14:00:00Z

A Escola Técnica Superior de Arquitectura (ETSAC) da Universidade da Coruña presentou na mañá deste luns 18 de maio o FabLab ETSAC Coruña, o primeiro laboratorio de fabricación dixital da UDC integrado na MIT Fan Lab Global Network, unha prestixiosa rede mundial de laboratorios de fabricación dixital nacida como un proxecto de divulgación do Center for Bits and Atoms (CBA) do Instituto de Tecnoloxía de Massachusetts (MIT).
En palabras da UDC, esta integración supón “un fito para a escola e tamén para a Universidade” e sitúa á ETSAC entre “o reducido grupo de escolas de arquitectura españolas que contan cun laboratorio plenamente acreditado dentro desta rede internacional”.
Ademais, engadiron fontes da institución educativa coruñesa, “constitúe un dos dous únicos FabLabs activos de Galicia, convertendo á UDC nun nodo estratéxico para o desenvolvemento da fabricación dixital e da cultura maker no noroeste peninsular”.
A presentación tivo lugar na propia ETSAC, nun acto que contou coa participación da vicerreitora de infraestruturas e sustentabilidade da UDC, Sonia Vázquez, o vicerreitor de investigación e transferencia, Jerónimo Puertas, e o director da ETSAC, Miguel Abelleira, así como do director responsable do laboratorio, o docente do Departamento de Construcións e Estruturas Arquitectónicas, Civís e Aeronáuticas, José Antonio Vázquez.
O laboratorio naceu no curso 2013-2014 a partir da transformación do antigo obradoiro de maquetas da escola nun espazo de fabricación dixital avanzada, converténdose logo nunha infraestrutura de referencia en innovación, docencia e investigación aplicada á arquitectura e ao deseño e integrándose de forma transversal na actividade académica da ETSAC.
Actualmente, o FabLab participa en actividades docentes do Grao en Arquitectura, o Máster Universitario en Arquitectura, o Máster de Rehabilitación e o Máster de Formación Permanente en BIM da UDC, ademais de organizar cursos especializados en deseño paramétrico e fabricación dixital.
O FabLab ETSAC Coruña dispón de equipamento avanzado de impresión 3D, corte e gravado láser, fresado CNC, fabricación robótica e prototipado electrónico, ademais de 60 estacións informáticas con altas capacidades gráficas accesibles para alumnado e profesorado da ETSAC.
Entre os recursos técnicos do laboratorio destacan cortadoras láser, impresoras 3D, fresadoras CNC de gran e pequeno formato, sistemas de corte por fío quente controlado numericamente e un brazo robótico destinado a tarefas de fresado e fabricación avanzada.
O FabLab ETSAC Coruña é tamén membro fundador da recentemente creada Rede de Investigación Universitaria en Creación e Fabricación Dixital e participa activamente en proxectos e iniciativas de innovación colaborativa, tanto no ámbito académico como social.
Ao longo dos últimos anos colaborou con diversos grupos de investigación da UDC e participou en iniciativas como Coronavirus Makers Galicia ou a Bienal Internacional MUGAK de San Sebastián. Ademais, a acreditación acadada tras a participación de persoal investigador da ETSAC no programa internacional FabAcademy 2025 reforza a proxección internacional do laboratorio e abre novas oportunidades de cooperación e mobilidade académica.
A UDC destaca que “o laboratorio mantén tamén unha clara vocación de apertura á sociedade, seguindo os principios impulsados por Neil Gershenfeld desde o Center for Bits and Atoms do MIT, fundador da rede internacional de FabLabs”.

Unha charla na Coruña convida a distanciarse do algoritmo

Redacción — 2026-05-18T12:02:22Z

A comunidade de WordPress Coruña celebrará o vindeiro xoves 21 de maio ás 19.30 horas unha nova charla centrada en estratexias dixitais afastadas da dependencia dos algoritmos das grandes plataformas. O encontro terá lugar nas instalacións de WeKCo baixo o título Vender sen pensar no algoritmo.
A sesión correrá a cargo de Rodrigo Varela, responsable técnico e de marketing de El Amasadero, quen compartirá a súa visión tras máis de dúas décadas traballando no deseño de estratexias dixitais.
A proposta pasa por cuestionar a obsesión polas métricas, os cambios constantes nos algoritmos de redes sociais como Instagram ou as actualizacións do buscador de Google.
A charla pretende convidar os asistentes a reformular a súa relación coas plataformas dixitais, apostando por unha presenza en liña máis sustentable e menos condicionada polas modas e tendencias. Varela defende priorizar a imaxinación, atopar unha voz propia e adoptar métricas máis sensatas, evitando «as carreiras de tolos» por adaptarse continuamente aos cambios impostos polos algoritmos.
O encontro incluirá tamén o habitual espazo de networking posterior, acompañado de petiscos e bebidas. A organización lembra que as prazas son limitadas e recomenda realizar inscrición previa a través de Meetup.

A UDC e Nunsys Group abren a convocatoria das Bolsas Sof.ia para promover o talento feminino STEM

S. P. — 2026-05-18T11:17:41Z

Fomentar o talento feminino e espertar vocacións en disciplinas STEM entre alumnas de secundaria é o obxectivo das Bolsas Sof.ia by Nunsys Group, unha iniciativa da UDC xunto á compañía tecnolóxica Nunsys Group, referente en innovación e transformación dixital, enmarcada na súa estratexia de responsabilidade social corporativa que conta co apoio do almacenista tecnolóxico TD SYNNEX.
Cómpre sinalar que este programa vai dirixido a persoas con identidade de xénero feminina residentes en España que superen o segundo curso de bacharelato ou dun ciclo formativo de grao superior durante este ano académico e desexen cursar un grao universitario do eido tecnolóxico; e contará coa colaboración da UDC xunto a outras 6 institucións académicas de titularidade pública en España: Universidade de Castela-A Mancha, Universitat Jaume I (Castellón), Universidade de León, Universidade Pablo de Olavide (Sevilla), Universitat Politècnica de València e Universidade de Zaragoza.
O prazo de inscricións comezou o 15 de maio e permanecerá activo até o 15 de xuño ás 14 horas (hora peninsular española), a través da web de Nunsys.
“Coas Bolsas Sof.ia queremos contribuír á redución da fenda de xénero, acompañando ás futuras profesionais no seu desenvolvemento académico e laboral”, explicou Gabriel Barreiro, delegado en Galicia de Nunsys Group, no acto de sinatura do convenio de colaboración entre ambas as entidades. Desde a UDC salientaron o valor das alianzas universidade-empresa: “iniciativas como esta contribúen a atraer, xerar oportunidades e consolidar o talento feminino en titulacións STEM estratéxicas para o futuro da nosa sociedade”, sinalou Ricardo Cao, reitor da Universidade da Coruña.
Indo á cobertura destas Bolsas Sof.ia, sinalar que a súa adxudicación estará baseada en maior medida en criterios de excelencia académica detallados nas bases reguladoras e sufragará os custos de matrícula, ou importe equivalente en caso de gratuidade, de dous cursos académicos completos nunha titulación da Universidade da Coruña (a elixir polas beneficiarias) entre os Graos en Enxeñaría Informática, Ciencia e Enxeñaría de Datos; Enxeñaría Industrial; Enxeñaría de Tecnoloxías Industriais; Electrónica Industrial e Automática, Deseño Industrial e Desenvolvemento de Produtos, Enxeñaría Eléctrica; e Enxeñaría Mecánica e Intelixencia Artificial, que se inclúen no abano dos 17 graos científico-tecnolóxicos amparados polo programa. A renovación para o segundo ano requirirá que as bolseiras superen satisfactoriamente o 75% dos créditos do primeiro curso.
Alén do apoio económico, o programa achega un completo itinerario de acompañamento personalizado, que inclúe mentoría con empregadas do ámbito tecnolóxico de Nunsys Group e acceso a prácticas formativas remuneradas tras a superación do primeiro ciclo académico nalgunha das delegacións de Nunsys Group, facilitando a transición entre a contorna académica e o mercado laboral.

YouTube estende aos creadores unha tecnoloxía que detecta deepfakes

Marcus Fernández — 2026-05-18T10:49:41Z

YouTube leva dende finais do ano pasado probando unha tecnoloxía dentro do seu programa de partners que complementa ao seu sistema de detección de contidos que vulneran o copyright e que, en vez de buscar contidos copiados, detecta contidos semellantes, facilitando a localización de contido creado mediante IA no que se suplanta a identidade dos creadores, que así poden solicitar a súa retirada.
Esta tecnoloxía parece estar a resultar bastante efectiva, e para facilitar a eliminación de contido falso en YouTube, a plataforma está a ampliar paulatinamente a tecnoloxía de detección de contido semellante a todos os creadores que teñan máis de 18 anos de idade.
O sistema detecta contidos en YouTube nos que figuren persoas cunha cara semellante á do creador de cada canle, para que eles mesmos poidan comprobar se son contidos creados con IA suplantando a súa identidade, tras o que poderán solicitar a súa retirada, protexendo así a súa imaxe e tamén evitando que os seus seareiros poidan verse enganados por suplantadores.

Vídeo de presentación da tecnoloxía de detección de semellanzas en YouTube

Bizum Pay inicia a súa despregadura

Marcus Fernández — 2026-05-18T09:52:38Z

Numerosos medios de comunicación están a dar conta hoxe do lanzamento en España de Bizum Pay, a tecnoloxía que permitirá pagar con Bizum en establecementos comerciais físicos mediante tecnoloxía contactless, pero cómpre salientar que estamos a falar unicamente do disparo de saída dunha despregadura que non está previsto que se complete ata o outono.
Polo momento só hai unhas poucas entidades bancarias que soben ao carro de Bizum Pay (CaixaBank, Banco Sabadell, Bankinter e o Grupo Caja Rural) e só ofrecen o servizo a uns poucos clientes, e como mostra dixo temos que nin sequera na páxina web oficial de Bizum se fala de Bizum Pay, polo que podemos considerar que o novo servizo está aínda nunha fase de probas técnica.
Na práctica, case non existe ningún establecemento no que hoxe é posible pagar con Bizum Pay, e non está previsto a que esta tecnoloxía se normalice ata o outono, cando é de esperar que as entidades bancarias realicen unha importante campaña de comunicación, xa que son as impulsoras desta tecnoloxía que busca afastarse de Visa e MasterCard, entidades que cobran comisións das que as entidades europeas queren fuxir.

Conta atrás para a chegada da Zona Indie Dev a ExpOtaku A Coruña

S. P. — 2026-05-18T09:00:54Z

A menos dunha semana da súa celebración, comeza a conta atrás para a chegada da Zona Indie Dev de ExpOtaku A Coruña, que volverá os días 23 e 24 de maio en ExpoCoruña coa súa edición máis ambiciosa ata a data.
Tras confirmar máis de 50 videoxogos repartidos en 40 postos completamente ocupados, a organización da Zona Indie Dev adianta agora parte das actividades que se desenvolverán durante o evento, incluíndo torneos, desafíos, premios, sorteos e propostas participativas para o público.
Segundo confirmou a organización, a programación seguirá ampliándose ao longo da semana e poderá consultarse na web oficial de actividades.
Engaden que a falta de poucos días para o evento, a edición de maio de 2026 xa conta con distintas actividades paralelas organizadas tanto pola propia Zona Indie Dev como por algúns dos estudos participantes e centros de formación presentes no evento.
Torneos e competicións
Un dos grandes atractivos desta edición serán os diferentes torneos e desafíos competitivos abertos ao público. O centro de formación Liceo La Paz organizará un torneo de Decay, un boomer-shooter centrado en velocidade, movementos extremos e puntuación, onde os participantes deberán competir por entrar nunha gran final entre as catro mellores puntuacións do evento. O gañador obterá un vale de 10 euros para Steam.
Pola súa banda, Axóuxere Games celebrará un torneo do modo Acumula Puntos de Colours, onde os asistentes poderán competir por lograr a maior puntuación posible antes do peche da xornada do sábado. O gañador recibirá material promocional exclusivo do xogo.
Ademais, o estudo Widijou organizará varias actividades relacionadas con Golpes e Porrazos, incluíndo un Rei de Pista competitivo o sábado 23 e un torneo informal o domingo 24, ambos con premios especiais para os participantes.
Premios Zona Indie Dev
A Zona Indie Dev volverá contar cos seus premios oficiais, destinados a recoñecer o traballo e creatividade dos estudos participantes.
O evento contará con dúas categorías principais de premios:
-Favorito do Público, elixido polos asistentes tras probar distintos xogos da zona.
-Favorito da Zona Indie Dev, decidido mediante votación entre os propios estudos participantes.
En ambas as categorías entregaranse premios de primeiro e segundo posto, recoñecendo así a varios dos proxectos máis destacados do evento.
Todos os galardoados recibirán un trofeo conmemorativo desta edición, cun deseño de inspiración lovecraftiana, ademais de diferentes lotes de videoxogos. Estes premios incluirán unha ampla selección de títulos grazas ao apoio de Tesura Games, JanduSoft e Devilish Games.
Sorteos e participación do público
A organización confirmou tamén que a participación activa do público volverá ter un papel fundamental dentro da Zona Indie Dev.
Todas aquelas persoas que completen o Pasaporte Indie e participen nas votacións oficiais poderán acceder ao sorteo oficial da Zona Indie Dev, composto por 5 sorteos en total.
Estes premios incluirán videoxogos grazas ao apoio de Tesura Games, Devilish Games e JanduSoft, xunto con material promocional e produtos exclusivos doados polos propios estudos participantes.
Os sorteos celebraranse o domingo 24 de maio ás 14.00 en directo dentro do evento no escenario despois da entrega de premios
Ademais, algúns estudos participantes organizarán os seus propios sorteos independentes. Entre eles destaca Nine Bites, que regalará lotes de merchandising do seu videoxogo The Sample entre as persoas que proben a demostración e participen na súa actividade.
O Pasaporte Indie
Como parte das actividades do evento, os asistentes tamén poderán completar o Pasaporte Indie da Zona Indie Dev. Cada estudo participante contará cun selo dixital exclusivo asociado ao seu videoxogo. Os visitantes poderán desbloquealos escaneando códigos QR tras probar os diferentes xogos presentes na feira. A iniciativa busca “incentivar que o público descubra novos proxectos e percorrer toda a zona indie durante o evento, ademais de dar paso ao acceso á votación e con iso aos sorteos”.
Unha experiencia máis completa
A organización busca que a Zona Indie Dev non “sexa unicamente un espazo para probar videoxogos, senón tamén un lugar de encontro entre xogadores, prensa, creadores e profesionais do sector”.
A edición de maio de 2026 reunirá talento de toda Galicia e de distintos puntos de España, consolidando o crecemento que o evento experimentou durante os últimos anos.
Con esta programación paralela, a organización reforza a súa aposta por converter a Zona Indie Dev nun dos espazos máis activos dentro do evento.

O certame Dalle Like Galinfluencers celebrou en Lugo a gala final da súa 1ª edición

S. P. — 2026-05-18T08:00:00Z

A primeira edición dos Premios Dalle Like Galinfluencers celebrou este sábado 16 de maio a súa gala final no Círculo das Artes de Lugo, entre as 20.00 e as 23.00 horas, un acto dirixido a “reivindicar o talento galego nas redes sociais”. Contou cunha actuación de Lucía Pérez e unha festa posterior no Versus XL con DJ Kike Varela. Tamén participaron 10 puxantes cociñeiros galegos.
A gala foi un evento benéfico, no que se recadaron fondos para a Protectora de Animais de Lugo.
O certame tivo o apoio de institucións como a Deputación de Lugo, que achegou 3.000 euros para o seu desenvolvemento e o seu impulso.
O certame tamén contou co apoio da Secretaría Xeral da Lingua que dirixe Valentín García, e máis da Consellería de Medio Rural.
Como dixemos, os Premios Dalle Like, que viñeron na súa primeira edición con 10 categorías, buscaban recoñecer o talento galego no ámbito dixital e das redes sociais.
Entre os persoeiros que participaron gala atopábase o deputado de Promoción Económica e Social, Pablo Rivera Capón, que valorou das e dos participantes a “creatividade e as horas de traballo” que realizan para “conectar coa xente” e destacou especialmente a súas capacidades para “crear comunidade desde algo tan simple, e complicado ao mesmo tempo, como ter unha voz propia. Unha voz que gala desde Galicia, a provincia de Lugo, coa nosa forma de ver o mundo, coa nosa retranca, cultura e naturalidade de quen non necesita parecerse a ninguén para conectar”.
“Na Deputación de Lugo sentimos orgullo de apoiar unha iniciativa coma esta porque sodes persoas capaces de transformar unha idea en algo que conecta coa xente. E iso sempre merece recoñecemento”, engadiu o deputado, ao tempo que felicitou ás persoas que organizaron esta cita, así como aos nomeados e a todos os premiados.
O evento premiou aos mellores influencers en nove categorías diferentes: cultura, humor, moda, viaxes ou deportes, entre outros. Ademais, a programación estivo ambientada nunha romaría tradicional con postos dirixidos por 10 cociñeiros galegos.

A Aula CeMIT da Deputación de Pontevedra acolle en xuño un obradoiro para mellorar competencias dixitais

S. P. — 2026-05-18T07:43:53Z

A Deputación de Pontevedra acolle durante o mes de xuño na Aula CeMIT un obradoiro presencial destinado a facilitar o uso das novas tecnoloxías no día a día. Nesta ocasión, o obradoiro, baixo o título Crea contido con Intelixencia Artificial, celebrarase do 1 ao 4 de xuño en horario de 10.00 a 13.00 horas.
A acción formativa, de 12 horas de duración, permitirá aos asistentes aprender a empregar ferramentas de intelixencia artificial para xerar ideas orixinais, escribir textos, deseñar imaxes e crear vídeos profesionais en cuestión de minutos.
A través do obradoiro achegaranse as pautas e claves para crear contido de calidade co apoio da IA. As persoas interesadas en asistir poden inscribirse ata o 28 de maio na web do CeMIT.
Crea contido con Intelixencia Artificial é un taller totalmente gratuíto e desenvolverase na Aula CeMIT situada no Edificio Administrativo da Deputación na cidade de Pontevedra. A acción forma parte do programa YoConecto promovido pola Fundación Cibervoluntarios, con 15 prazas dispoñíbeis. Ao seu remate, as persoas participantes recibirán un certificado oficial.